Skića dohlad do najmodernišich technikow

srjeda, 03. julija 2019
artikl hódnoćić
(0 )
Zajimowany sćěhuje šuler 12. lětnika Powołanskošulskeho centruma Richard Kriegel wuwjedźenja Maika Jähny wo 3D-ćišćaku typa Ultimaker 2.  Foto: SN/Hanka Šěnec Zajimowany sćěhuje šuler 12. lětnika Powołanskošulskeho centruma Richard Kriegel wuwjedźenja Maika Jähny wo 3D-ćišćaku typa Ultimaker 2. Foto: SN/Hanka Šěnec

Budyšin (SN/pdź/mwo). Na šulskim dworje Budyskeho powołanskošulskeho centruma na Schillerowych zelenišćach steja wot minjeneho pjatka tři běłe slědźen­ske kontejnery, tak mjenowane TRAILS. Jedna so tu wo projekt tech­niskeju wy­sokeju šulow w Drježdźanach a Wrócławju, spěchowany přez Europski fonds za re­gionalne wuwiće.

Kontejnery TRAILS-programa pućuja hižo wot nalěća 2017 tydźensce po wuchodnej Sakskej a Delnjej Šleskej. Tam tworja wotpowědne stacije. Su to šulske dwory a druhe centralne zetkanišća. Wot póndźele do štwórtka přewjeduja w kontejnerach workshopy za zajimowanych šulerjow a runje tak za přistajenych lokalnych předewzaćow.

Na dźěłarničkach ze skazanymi fachowcami dźe hłownje wo to, zajimcam techniske móžnosće dźensnišeho časa předstajić. Tak maja w kontejnerach na přikład 3D-ćišćaki, nawoči za wirtuelnu realitu a robotery z legokamuškow, kotrež dadźa so programěrować a dalokoposłužować.

wozjewjene w: Kubłanje
Prošu přizjewće so, chceće-li komentar podać

Serbska debata

nowostki LND