Spěchowanske towarstwo za Worklečansku wyšu šulu załožene
Worklecy (JK/SN). Minjene lěta nastawachu w přiběracej ličbje spěchowanske towarstwa. Lěpšiny tajkeho spěchowanskeho cyłka chce tež předwčerawšim, srjedu, załožene towarstwo za spěchowanje Serbskeje wyšeje šule „Michał Hórnik“ Worklecy wužiwać.
Nimale dwaceći zajimcow zetka so we Worklecach z krutym zaměrom, towarstwo załožić. Mjez přitomnymi běštaj tež Worklečanski wjesnjanosta Franc Brusk (CDU) a nawoda tamnišeje wyšeje šule Křesćan Korjeńk.
Zhromadźiznu zahaji staršiski rěčnik šule Dirk Hentschel a skedźbni na zaměr towarstwa. Wučerjej Diana Šołćina z Róžanta a Beno Hojer z Chrósćic běštaj wo wotpohladach spěchowanskeho towarstwa rozmyslowałoj a naćisk wustawkow zdźěłałoj. „Chcemy ze spěchowanskim towarstwom wšitkim, kotřiž so za kubłanišćo a wšitko kołowokoło njeho horja a starosća, dać instrument do rukow, dźěło a nahladnosć šule skrućić“, zjima Beno Hojer wotmysł wječora.