Delnja Łužica čaka na nowe wuwučowanske a wučbne srědki
Choćebuz/Budyšin (SN/MiR). Skutkowanje fachowcow Rěčneho centruma WITAJ, kotřiž wuwiwaja wuwučowanske a wučbne srědki za Hornju a Delnju Łužicu, je mnohostronske. Tak wuwiwaja w Delnjej Łužicy – a to je jenož jedne z ćežišćow skutkowanja RCW – lětsa nowy wobrazowy słownik „Swět wokoło nas“ za wužiwanje Bookiija-słuchopisaka. Mnohe hornjoserbske dźěći jón hižo maja. W Delnjej Łužicy maja nětko nahrawanja zwoprawdźić a wosebje techniske dźěło rjadować. Wo wobsahowe zdźěłanje knihi je so sobudźěłaćerka za wědomostne dźěło a rěčny marketing dr. Madlena Norbergowa z RCW w Choćebuzu zhromadnje ze štyrjomi wučerkami starała. „Něhdźe 90 procentow tekstow smy z hornjoserbskeje warianty přenjesli, nic pak temy wo specifiskich nałožkach a wosebitosćach Delnich Serbow a jich domizny. Tajke su tamniše fachowče same spisali“, rozłožuje wotrjadnica RCW za wuwiwanje rěče/pedagogika Annett Dźědźikowa. Nětko dźe předewšěm wo to, namakać rěčnikow a jim wšelake wosoby, kotrež so w knize jewja, přirjadować.