Po wotchadźe rutinjejow Roberta Müllera (33) a Dimitara Rangelowa (37) započnje so nowy start prěnjeho koparskeho mustwa FC Energije Choćebuz z jasnje womłodźenej wobsadku. Ze sportowym direktorom Sebastianom Königom je so Georg Zielonkowski rozmołwjał.
Hdyž přiběži mustwo na trening na sportnišćo, móžeš sej myslić, zo znaješ jenož hišće połojcu hrajerjow. Maće tójšto nowych a wosebje młodych mjezwočow.
S. König: Na haj, cyle tak to nětko tež zaso njeje. Nimo Nilsa Stettina a Patricka Storba smy tójšto młodych hrajerjow z našich rjadow do treninga wzali. Nětko 21lětny Mathis Lange je něhdyši hrajer dorosta FC Energije. Pola njeho chcemy hladać, kak so to wšo wuwije. Lange bě so mjenujcy w Burghausenje zranił. Z młodźiny A trenujetaj z prěnim mustwom Jeremy Postelt a Elias Bethke. Kelvin Lunga je potajkim jenički, kiž je dospołnje njeznaty. Wón je dotal pola Fortuny Köln hrał a chce so pola nas jako nadběhowar z probowym treningom za zrěčenje poručić.