Dokelž bě wjelelětny nazwučowar koparjow ST Marijineje hwězdy Erwin Kleinmann swoje zastojnstwo złožił, trjebachu za nowu hrajnu dobu noweho šeftrenarja. Jeho zastupjer Bodo Pjetaš bě zwólniwy za tutón ćežki nadawk a je wotnětka prěni muž na ławce módro-žołtych. Tobias Nowak je so z nim rozmołwjał.
Knježe Pjetašo, wy sće potajkim nowy trenar prěnjeho koparskeho mustwa muži w Pančicach-Kukowje. Prošu Was so skrótka předstajić?
B. Pjetaš: Sym 49 lět stary a pochadźam poprawom z Pančic, bydlu pak nětko w Kamjencu. Mam tři dźěći. 21lětny Feliks hraje w prěnim mustwje ST Marijineje hwězdy, 18lětna Nele pola žonow w Hlinowcu za bulom honi. Najmłódša, jědnaćelětna Lotta, so za kulowatu kožu docyła njezajimuje (so směje). Dźěłam w Drježdźanach jako nawoda twarskeho běrowa Axel Zwicker GmbH a sym wukubłany molerski mišter a swobodny twarski wěcywustojny. Mojej hobbyjej stej wudźenje a dart.
Sće sam tež kopar był, a sće dotal hižo jako trenar dźěłał?