Budyšin (SN/MiR). Wuměłske twórby sej wotkryć je tema Budyskeho Serbskeho muzeja. Při tym měrja so muzejownicy tuchwilu ze swojim poskitkom „Što nam wobrazy powědaja“ wosebje na hortowe skupiny. Tež swójby sej rady do wustajeńcy dóńdu a dadźa so tam wot wšelakich wuměłcow a jich stilow wobkuzłać. „Wšojedne, kotreje starobneje skupiny wopytowarjo su, my so jim přiměrimy“, zwěsća zamołwita za zjawnostne dźěło w muzeju Mónika Ošikowa.
W galeriji namakaja zajimcy twórby mnohich wuměłcow, wot Měrćina Nowaka Njechorńskeho přez Hanku Krawcec, Jana Buka a Boženu Kunysz-Nawka hač k Maji Nagelowej a Šćěpanej Hanušej. Runje tak předstajeja tam mjez druhim Conrada Felixmüllera abo Ludvika Kubu, kotrajž drje serbskeho pochada njeběštaj, měještaj pak Serbow a jich domiznu za putacy motiw tworjenja.
