Serbske a serbšćinu podawace šule za system po zdaću přemałe

Budyšin (SN/MiR). Rěčny centrum WITAJ widźi lěpšiny w systemje zhromadnych šulow w Sakskej. Nawodnica RCW dr. Beata Brězanowa zwuraznja: „W tajkej šuli móža šulerjo dlěje zhromadnje wuknyć, a jim je přez diferencowane wuwučowanje zdobom šulski puć hač do 12. lětnika wotewrjeny. Wosebje we wjesnych kónčinach su zhromadne šule wu­znamna móžnosć, tež šulskeho puća dla.“ Zasadnje za spomóžne ma je tež Lud­mila Budarjowa. „Zhromadne wu­knjenje je jako poskitk k tuchwilnemu šulskemu systemej w Sakskej zajimawa alternatiwa“, předsydka Serbskeho šulskeho towarstwa rozłožuje, „wšako so šule­rjo rozdźělnje wuwiwaja, sej na wšelakore wašnje wědu přiswojeja a móža tak dlěje zhromadnje wuknyć.“

Srjedź julija bě Sakski krajny sejm wo dlěšim zhromadnym wuknjenju na šulach wothłosował. Přihłosować matej tomu, wutworić zhromadnu šulu, zasadnje šulski nošer kaž tež šulska konferenca.