Wot lěta 2001 hižo wuchadźa w Rěčnym centrumje WITAJ časopis „Lutki“. Najprjedy w hornjoserbšćinje koncipowany ma wón mjeztym tež w Delnjej Łužicy swojich swěrnych woteběrarjow.
Budyšin (SN/MiR). Časopis měri so na dźěći, kotřiž su maćernorěčneho pochada, abo kotřiž serbsce wuknu, kaž tež na jich staršich. Štyri razy wob lěto publikacija wuchadźa. Za kubłarki a kubłarjow přida RCW přiručku z didaktisko-metodiskimi pokiwami, kotrež w „Lutkach“ zapřijate temy pohłubšeja. Tež w zakładnych šulach a hortach zešiwk rady wužiwaja. Něhdyša sobudźěłaćerka RCW, Sylwija Wjeńcyna, běše „Lutki“ hač do lěta 2013 wudała. Mjeztym wuchadźeja hižo 19. lěto. Weronika Butendeichowa, kotraž so jako wobdźěłarka projektow wo „Lutki“ stara, wobsah časopisa lětnje planuje. Za dźěl, kotryž měri so na staršich, su to předewšěm rěčno-kubłanske temy. Dźěl za dźěći je so w zašłych lětach na serbskich nałožkach orientował. Tak zaběra so tež přichodne wudaće z woblubowanym nałožkom, swjedźenjom swjateho Měrćina. Dale změja interview wo poskitkach serbskich babow w Swinjarni.