Dalekubłanske kursy přewjesć

wutora, 11. awgusta 2020
artikl hódnoćić
(0 )

Rěčny centrum WITAJ (RCW) w Choćebuzu wuhotuje nazymu tři dalekubłanske kursy za kubłarki dźěćacych dnjowych přebywanišćow, to rěka žłobikow, pěstowarnjow a hortow.

Choćebuz (SN/MiR). Hižo nětko je so tójšto zajimcow za kursy přizjewiło, kotrež chcedźa w septembru a oktobru wotměć. Woni budu so potom stajnje wot wutory do štwórtka z delnjoserbskej rěču kaž tež ze žiwjenjom w Delnjej Łužicy zaběrać, mjez druhim z pěstowanjom nałožkow. Dźěłodawarjo tónle poskitk podpěruja. Tak připóznawaja wobdźělenje zdobom jako dźěłowy čas. „Mnohe kubłarki su so na naše poručenje na kursy přizjewili“, zdźěli komisariski nawoda RCW Bernd Melcher, kiž zastojnstwo tuchwilu zhromadnje z kolegu Aleksanderom Dragułu wukonja. „A wone su za poskitk jara dźakowne.“ Za RCW w Choćebuzu su to prěnje zarjadowanja po wudyrjenju korony. Wotprajić dyrbjachu předewšěm lětnje poskitki za dźěći a młodostnych. Tak wupadny lětuši rěčny camp za serbšćinu wuknjacych. Tež na šulach woblubowany zeleny tydźeń, kiž bě tele dny planowany, dyrbjachu wotprajić. RCW so nadźija, zo móže přichodnje zaso fachowe konferency za wučerki a wučerjow přewjesć, kiž na delnjołužiskich šulach delnjoserbšćinu wuwučuja.

W Choćebuskej wotnožce Budyskeho RCW maja wot 1. awgusta noweho sobudźěłaćerja. Wjelelětna lektorka Ingrid Hustetowa bě so njedawno na wuměnk podała. Po wupisanju skutkuje nětko na jeje městnje Franc Juro Deuse jako lektor we wobłuku rěčne wuwiwanje/pedago­gika. Wón wěnuje so předewšěm wobdźěłanju wučbnicow za dźěći wšelkeje staroby, kotřiž na šulach delnjoserbšćinu wuknu. Z Picnja pochadźacy Deuse je w Lipsku wučerstwo studował a w lektoraće RCW praktikumaj wukonjał. Nimo swojeho dźěła w RCW, kotrež je před něšto wjace hač tydźenjom zahajił, je wón docent za delnjoserbšćinu na Šuli za delnjoserbsku rěč a kulturu w Choćebuzu. Wón je wučer w Luborazu był. Na Picnjanskej zakładnej šuli, hdźež je naposledk wuwučował, budźe wón tež dale delnjoserbšćinu podawać.

Wot noweho šulskeho lěta, kotrež je so w Braniborskej wčera, póndźelu, za­po­čało, ma Zakładna šula „Lutki“ w Žylowje Madlin Gjarźic za nowu komisarisku nawodnicu. A Beata Wagnerowa nawjeduje nětko tamniši Witaj-hort.

wozjewjene w: Kubłanje
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND