Pančičanki a Worklečanki treningowe lěhwo přewjedli

wutora, 25. awgusta 2020
artikl hódnoćić
(0 )
Pančičanki a Worklečanki su so we Worklecach zhromadnje na nowu hrajnu dobu přihotowali, w kotrejž tworja wone lětsa město dweju jenož jedne zhromadne mustwo. Nastupić budźe cyłk we wobwodnej lize stafla II. W njej hrajetej mjez druhim tež mustwje ST Viktorije Worklecy a Módro-běłe Wojerecy.  Foto: Tereza Wićazowa Pančičanki a Worklečanki su so we Worklecach zhromadnje na nowu hrajnu dobu přihotowali, w kotrejž tworja wone lětsa město dweju jenož jedne zhromadne mustwo. Nastupić budźe cyłk we wobwodnej lize stafla II. W njej hrajetej mjez druhim tež mustwje ST Viktorije Worklecy a Módro-běłe Wojerecy. Foto: Tereza Wićazowa

Nowa sezona, nowe koło, nowy přeběh. Hrajna doba 2020/2021 so bliži.

W awgusće přewjedźechu wolejbulistki Hrajneho zjednoćenstwa Pančicy-Worklecy třidnjowske treningowe lěhwo w domjacej hali we Worklecach. Zazběh dyrbješe pjatk treningowa jednotka w Porchowskej kupjeli pod hołym njebjom tworić. Tón pak je posłownje do wody padnył. Dešćik a hrimanje běštej zamołwitej, zo mějachu so žony wo alternatiwu starać. Dźakowano mužam-wolejbulistam Viktorije Worklecy, kiž běchu jich treningowy čas žonam přewostajili, dokelž bě jich wotprajeny, bě prěnja zwučo­wanska jednotka w hali móžna. Na planje steještej mustwowe posedźenje kaž tež prěni trening, wopřijacy hrajne formy a zakónčacu treningowu hru.

Treningowe dopołdnjo sobotu při přijom­nych temperaturach z lochkim rańšim běhom wokoło a přez Worklecy započachu. Slědowaše prěnja jednotka, w kotrejž wolejbulistki hłownje hornje přihraće zwučowachu. Mjez druhim pospytachu so hrajerki w přihrawce přez hłowu, štož bě za přistajerki wažne zwučo­wanje. Prěni blok wotzamknychu z hru.

wozjewjene w: Sport
Prošu přizjewće so, chceće-li komentar podać

Serbska debata

nowostki LND