Koncept 2plus ma tež na nowym stejnišću zapřijaty być
Wojerecy (SN/MiR). Handrija Zejlerjowa zakładna šula Wojerecy změje swoje stejnišćo wot spočatka šulskeho lěta 2022/2023 w něhdyšej wyšej šuli „Na kromje města“. Lěta 1959 twarjene a 1995 saněrowane twarjenje ma potom tež hort wopřijeć. Měšćanska rada je trěbne twarske předewzaće na swojim njedawnym posedźenju jednohłósnje wobzamknyła. Tak je zdobom za dwójny etata 2021/2022 trěbne planowanje financow wobkrućiła. Wyši měšćanosta Stefan Skora (CDU) ma nětko nadawk, trěbne zarjadowanje do planowanja etata zawěsćić. „Zakładna šula budźe dwučarowa. Koncept 2plus ma so dale wjesć, a Křesćansko-socialny kubłanski skutk Miłoćicy (CSB) wostanje nošer horta, štož je do projekta zapřijate“, rjekny nawoda fachoweho wobłuka twarstwo města Wojerec Dietmar Wolf.