Jockusch, Patka a Henčl dale w čorno-běłym trikoće krajneho ligista
Jockusch so w lěću nawróći
Budissa Budyšin wužiwa koronowu přestawku wědomje za to, přichodnu sezonu planować. Tak hodźi so po někotrych podlěšenjach tež transfer naspomnić. Akter za srjedźne polo Paul Jockusch so po třoch lětach pola KST 1990 Nowosólca-Hródka w lěću zaso k Budissy wróći. Mjeztym 21lětny kopar je mjenujcy hižo hač do młodźiny A w čorno-běłym Budyskim trikoće wo dypki wojował a tam nazhonjenja zběrał.
Z kopańcu započał bě Jockusch pola Traktora Malešecy. Tam šnórowaše kopački hač do młodźiny D, prjedy hač so w starobnej klasy młodźina C za stolicu Serbow rozsudźi. W Nowosólcu-Hródku je wón w dohromady 49 partijach krajneje ligi 17 razow sam trjechił a dalše 19 wrotow za sobuhrajerjow spřihotował. Tak běše zdobom wulki garant za wuspěch swojeho mustwa. Pola swojeho noweho-stareho teama chce nětko z podobnej strašnosću před přećiwnymi wrotami wustupować. Wšitcy přiwisnicy so nadźijeja, zo so jemu to poradźi.
Statistika zasadźenjow Paula Jockuscha za jednotliwe cyłki