Nawodnicy šulow witachu nowačkow, wučerjow a referendarow
Budyšin (SN/MiR). W Sakskej je so dźensa nowe šulske lěto započało. Na wšě 494 500 šulerjow smě wotnětka zaso po rjadownjach zhromadnje wuknyć, tak tež nowačcy na serbskich a serbšćinu wuwučowacych zakładnych šulach.
W 1. lětniku Radworskeje zakładneje šule „Dr. Marja Grólmusec“ wuknje 30 holcow a hólcow w dwěmaj rjadownjomaj. Wosmjo z nich tworja swójsku, serbsku rjadownju a maja Andreju Mešerowu za rjadownisku wučerku. Dalšich 22 nowačkow wuknje pola Christiany Zwickloweje. „Dalokož hodźiny změjemy, chcemy w jeje rjadowni teamteaching nałožować“, praji nawodnica šula Angela Rynčowa. Jako šulska asistentka skutkuje na kubłanišću wotnětka Michaela Wjacławkowa.
Na Worklečanskej šuli „Michał Hórnik“ maja 28 nowačkow. Jednu rjadownju po 14 šulerjach nawjeduje Jadwiga Ošikowa, tamnu Jurij Bjeńš. Tež we Worklecach je wjeselo wulke. „Mamy dweju praktikantow, Aleksandra Wałdu a Leńku Šołćinu. A Tadeja Cyža smy jako šulskeho asistenta zdobyli“, rozprawja šulska nawodnica Sabina Hejdušcyna.