Nošerjo kubłanišćow aktualne korona-wukazy dokładnje čitaja
Budyšin/Miłoćicy/Chrósćicy (SN/MiR). Hač do 14. nowembra maja so wuknjacy kaž tež wučacy a dalši personal, kubłarki a kubłarjo w horće, trójce wob tydźeń na koronawirus testować. Antigenowe samotesty šulam dale bjezpłatnje přewostajeja. Šćěpjeni a wustrowjeni kaž tež dźěći w žłobiku a pěstowarni njetrjebaja so testować.
Tež nošerjo dźěćacych dnjowych přebywanišćow so z koronu wšědnje zaběraja. Zamołwity Křesćansko-socialneho kubłanskeho skutka Miłoćicy (CSB) za pěstowarnje Ronny Škoda na naprašowanje Serbskich Nowin zdźěli: „Smy wjeseli, zo w našich 15 kubłanišćach z 1 650 dźěćimi wšitko po planje běži. To rěka wšitke zarjadnišća su wotewrjene, nimamy nihdźe žane skrótšene wotewrjenske časy a njejsmy dotal tež žane skupiny zawrěć resp. hromadu połožić trjebali.“ Tola tež w dnjowych přebywarnjach CSB maja na koronu natyknjenych a schorjenych. Mjez personalom su jich tuchwilu štyrjo, mjez dźěćimi dźesać.