Budyska wodarnja ma bórze jako miniatura w sprjewinym měsće stać
Miłoćicy/Lubij (SN/MiR). Zhromadna akcija młodostnych z Lubijskeho socialneho zetkanišća Geistesblitz podpěruje Njebjelčanske towarstwo Kamjenjak. Z pomocu 3D-ćišćaka su woni Budysku Staru wodarnju w miniformaće zhotowili. Pjeć modelow ma słužić jako kasa, z kotrejž zběraja na impozantnych městnach Budyšina pjenjezy za wěžu po podobje Stareje wodarnje. Ze zornowca wudypana wěža ma potom předewšěm dźěćom wědu wo sławnym techniskim pomniku sprjewineho města posrědkować. „Nětko zběramy namjety, na kotrych městnach móhli 3D-modele nastajeć. Sym k tomu wšitkich čłonow narěčał“, rozprawja městopředsyda Kamjenjaka Hubert Lange.