Poslednje tydźenje chowaja w sebi wjacore wosebitosće a překwapjenja

Pančicy-Kukow, Radwor, Budyšin, Kukow (SN/MiR). Njecyły tydźeń hišće a potom maja šulerjo w Sakskej prózdniny. Zwjetša stej zašły a tón tydźeń běžałoj po wučbnym planje. Hdys a hdys su na šulach měli horcoty dla wupad abo skrótšenje wučby, tak na Budyskej Serbskej wyšej šuli 27. junija. „Rozsud wo tym, hač ćopłoty dla wučba wupadnje abo hač ju skrótšimy, twori stajnje šulske nawodnistwo“, zdźěli šulska nawodnica Kulowskeje wyšeje šule „Korla Awgust Kocor“ Ines Lešowa. 1. julija su wučbu skrótšili. Za to pak schadźowachu so wučerjo na konferencach, we pruwowanskim wuběrku, w personalnej radźe a při planowanju swjedźenja k zakónčenju šulskeho časa za wotpowědne lětniki. „Na našej šuli rozsudźi wučer, hač hodźi so 5. resp. 6. hodźina w rjadowniskej stwě wutrać abo hač je zmysłapołne sej chłódkojte městno pod hołym njebjom pytać“, zdźěli nawodnica Radworskeje zakładneje šule „Dr. Marja Grólmusec“ Angela Rynčowa.