Maturanća Budyskeho Serbskeho gymnazija wuswědčenja přijimali
Chrósćicy (SN/MiR). Zwuki klasiskeje hudźby přewodźachu 58 maturantow Budyskeho Serbskeho gymnazija minjenu sobotu na žurlu „Jednoty“ w Chrósćicach. Swjatočny to wokomik, jako přitomni starši, přiwuzni a hosćo na česć młodostnych, kotřiž kroča přez próh do noweho wotrězka žiwjenja, stanychu. Zakónčace zarjadowanje šulskeho časa lětušich maturantow su wobrubili 1. serbska kulturna brigada pod nawodom Friedemanna Böhmy, orchester gymnazija pod nawodom Conny Wolf kaž tež maturanća sami.