Tež na olympiadźe serbskeje rěče bědźa so z dale a špatnišej serbšćinu
Wodowe Hendrichecy (SN/MG). Dźěłapołna ćišina knježi na chódbach prózdninskeho přebywanišća KIEZ Querxenland. 94 dźěći z Hornjeje a Delnjeje Łužicy zaběra so hižo wot srjedy z temu woheń. 56. olympiada serbskeje rěče zarjaduje tež lětsa zaso Serbske šulske towarstwo. Marlis Młynkowa je hižo mnohe lěta za organizaciju olympiady zamołwita.
Na organizaciskim razu zarjadowanja so wjele změniło njeje, wona praji. Fachowa zamołwita zarjadowanja Sabina Jurencec powěda, zo maja tež lětsa zaso podobny modus kaž zašłe lěta: „My mamy pisomne pruwowanja w rěčnych skupinach jedyn, dwaj a tři. Prěnjej dwě skupinje pisatej nastawk. Třeća skupina ma wěcne a słuchanske nadawki.“ Tež ertny nadawk słuša k tomu. Tón nadźěłaja šulerjo w po rěčnym niwowje měšanych skupinach. Na kóncu ma nastać přednošk, kotryž šulerki a šulerjo na poslednim dnju fachowej jury předstaja.