Budyšin (SN/MiR). Słowje „napjatosć“ a „wjeselo“ wopisujetej začuća wobdźělnikow a wopytowarjow zarjadowanja w Budyskej Smolerjec kniharni minjenu sobotu najlěpje. Rěčny centrum WITAJ je na swoje mjeztym 20. čitanske wubědźo­wanje šulerjow 3. lětnikow ze serbskich a serbšćinu wuwučowacych zakładnych šulow přeprosyło. Najlěpši šěsnaćo sedźachu mjez swojimi towaršemi a towarškami, staršimi a přiwuznymi a radowachu so nad motiwaciju, kotruž jim nawodnica RCW dr. Beata Brězanowa posrědkowaše. Předsydka jury a wotrjadnica RCW Manuela Smolina předstaji jury, w kotrejž ­nimo njeje Sylwija Wjeńcyna (wučerka w Pančicach-Kukowje), Edit Mrózec (wučerka w Kulowje), Janina Mikławškowa (lektorka w Ludowym nakładnistwje Domowina) a Rejzka Wjeńcyna (dobyćerka prěnjeho wubědźowanja w lěće 2004) ­sobu skutkowachu. Na wšitkich wubědźowanjach je dohromady wjace hač 320 dźěći z 92 swojich najlubšich serbskorěčnych dźěćacych knihow čitało. Faworića běchu titule „Wroblik Frido“, „Knot Knut“ a „Bur Žur“ kaž tež „Pućowanje małeho pampucha“.