Najlěpši rěčnicy we Wodowych Hendrichecach zhromadnje dźěłali
Regionalny rěčny seminar wotmě so wot 26. do 29. nowembra 2025 we Wětrniku we Wodowych Hendrichecach. Idylisce ležacy kubłanski dom skićeše perfektnu atmosferu za štyri powučne a kreatiwne dny. Cyłkownje 38 rěčnje nadarjenych šulerkow a šulerjow z gymnazijow Budyskeho wokrjesa so tam zeńdźe, zo bychu so w šěsć rěčach ze zhromadnej temu „Z rěčemi přez medije“ zaběrali.
Z Budyskeho Serbskeho gymnazija wobdźělichu so na seminarje Mila Klimanec, Marta Malinkec a Sara Clausenec (8-1) z kursa čěšćiny kaž tež Valentina Šołćic (8-2) z kursa francošćiny. Šulerki buchu z najlěpšich swojeho fachoweho směra wuzwolene. Za kóždu rěč bě jenož šěsć do sydom wobdźělnikow z cyłeho Budyskeho wokrjesa přeprošenych, čehož dla je wopyt seminara wosebite wuznamjenjenje za wuzwolenych.
