Drježdźany/Budyšin (SN/MiP). Nic jenož na sakskich šulach změja lěto a mjenje nowych přizjewjenjow šulerjow (SN 10. decembra rozprawjachu) – tež w sakskich pěstowarnjach ličba dźěći spochi woteběra. Po statistice kultusoweho ministerstwa zličichu lětsa w oktobrje w swobodnym staće dohromady 311 949 dźěći w dnjowych přebywanišćach. Loni mějachu tam dohromady 319 418 dźěći. Porno předlětu je to 2,8 procentow mjenje. W Durinskej mějachu lětsa samo 5,2 procentaj mjenje dźěći w pěstowarnjach hač loni.

Tute wuskutki demografiskeho wuwića wšak su cyłoněmski zjaw. We wuchodoněmskich krajach pak je trend wosebje drastiski. Wóndano wušła studija Instituta němskeho hospodarstwa (IW) pokazuje, zo je ličba dźěći w starobje pod třomi lětami wot lěta 2019 wo 20 procentow spadnyła. Tež statistika porodow we wuchodnych krajach negatiwny trend wobkruća. W lěće 2016 narodźi so w Sakskej, Saksko-Anhaltskej a Durinskej dohromady něhdźe 74 000 dźěći, w lěće 2024 jenož hišće něhdźe 49 000, to je minus 34 procentow.