Radworska šula přihotuje so na stotu róčnicu swojeho załoženja

Radwor (SN/hn). Pod hesłom „100 lět šula Radwor: serbsce. němsce. zhromadnje.“ woswjeći Radworska šula za dobre tři njedźele swoje stolětne wobstaće. Pjatk, 9. oktobra 2026, su wšitcy starši, něhdyši šulerjo, wučerjo a hosćo na pisany jubilejny program přeprošeni. Při tym nochcedźa jenož na dołhe stawizny šule zhladować. Tež dźensniše šulske žiwjenje ma w srjedźišću stać.

Přihoty za wulki swjedźeń su hižo loni nalěto zahajili. Tehdy so organizatorojo prěni raz zeńdźechu, zo bychu ideje zběrali a jubilej planowali. Z kopicy namjetow a předstawow, kiž běchu zezběrali a zrjadowali, skónčnje najwažniše wuzwolichu. „Na spočatku mějachmy jara wjele idejow. Počasu smy tute napisali, rjadowali a naposledk na najwažniše redukowali“, nawodnica wyšeje šule Diana Wowčerjowa wuswětli.

„Při planowanju a organizowanju jubilejneho swjedźenja njestejachmy ženje sami. Dóstachmy stajnu podpěru wjesnjanostki, Radworskeho experiMINT-campusa a přistajeneje Zari, Raphaele Wićazoweje“, Wowčerjowa doda.