Budyšin. (SN/jp) Wot lěta 2024 wobsteji na wysokej šuli w Budyšinje móžnosć dualneho studija. Wo tym, zo maja studowacy tam najlěpše wuměnjenja, je so wčera statny sakski minister za wědomosć Sebastian Gemkow (CDU) přeswědčił. Nawodźe kubłanišća prof. Markusej Krabbesej je minister wopismo za rektora přepodał. Z tym je wón prěni swobodnje woleny rektor wysokeje šule w Budyšinje.

W słucharni kubłanišća witaše prof. Markus Krabbes přewažnje kolegow a koleginy. Mjez hosćimi pak běchu zdobom druhi měšćanosta Budyšina dr. Robert Böhmer, zapósłanc Sakskeho krajneho sejma Marko Šiman (CDU) a direktorka wysokeje šule prof. dr. Katharina Bühn. W swojich powitanskich słowach Krabbes wuzběhny, zo je dualne studowanje w Budyšinje jenož móžne, dokelž wobsteji wuski zwisk z lokalnymi zawodami. Mjez nimi je na přikład firma Edding, kotraž zhotowja pisaki z kumštnych maćiznow. Nic jenož kumštne maćizny pak su specialny wobłuk Budyskeje wysokeje šule, ale tež elektrotechnika a wot najnowšeho tohorunja mikroelektronika, kaž Krabbes hosći informowaše.