Kijew (dpa/SN). Ukrainski prezident Wolodymyr Zelenskyj je so po wopyće němskeho wicekanclera Roberta Habecka (Zeleni) za dale trajacu podpěru Němskeje dźakował. „Wažimy sej wodźacu rólu Němskeje, kotraž nješkita jenož žiwjenje w Ukrainje, ale cyłu Europu“, rjekny Zelenskyj w swojim wšědnym widejowym poselstwje. Na w juniju w Berlinje planowanej konferency za nowonatwar Ukrainy póńdźe wosebje wo bilateralne projekty brónjenskeje a energijoweje industrije, wón připowědźi. Z Habeckom je wón połoženje na fronće a zakitowanje powětroweho ruma wobrěčał. W tym zwisku Zelenskyj chwaleše, zo chce Němska Ukrainje dalši system za škit powětra Patriot přewostajić. Ukraina ćerpi ruskich nadpadow z trutami, raketami a lětacymi bombami dla.
Najebać přiběrace problemy na fronće pobrachowacych brónjow a municije dla šěrješe Zelenskyj optimizm. Ukraina brónje přiběrajcy sama produkuje.
Spodźiwne zwuki w hawbje nad kuchinskimi kachlemi su swójbu w poruhrskim Hünxe pohnuli, z nuzowym čisłom 110 wohnjowu woboru wołać. Wobydlerjo na to tukachu, zo je so zwěrjo do hawby zabłudźiło. Dobrowólni wohnjowi wobornicy na to dwě wjewjerčce wuswobodźichu. Zwěrjeći běštej so přez klapu wonkowneje murje do kuchnje předrěłoj. Jednu wjewjerčku přepodachu skótnemu lěkarjej, tamna so hnydom zminy.
Z nowej družinu lodu su Italčenjo składnostnje tuchwilneho předsydstwa skupiny G7 swojemu dobremu mjenu jako najkreatiwniši narod słódkeho lodu wotpowědowali: Składnostnje zetkanja wonkownych ministrow skupiny najwjetšich industrijnych krajow swěta na kupje Capri w Neapelskim zaliwje su nowu družinu „Gelato G7“ předstajili: Wšelake słody w barbach wšěch krajow.
Zwjazkowy sejm je 12. apryla nowelaciju prawa swójbnych a ródnych mjenow wobzamknył (SN informowachu). Nimo zasadneje reformy za wulke dźěle ludnosće z dalokosahacej liberalizaciju za swójbne mjena wobsahuje zakoń pak mału juristisku, zdobom za Sewjernu Frizisku wuznamnu sensaciju. W přichodźe su tež mjena dowolene, kotrež złožuja so na frizisku, serbsku a dansku tradiciju, rěka w nowinskej zdźělence, kotruž je Nordfriisk Instituut při tutej składnosći rozšěrił.
Drježdźany/Budyšin (SN/at). Krajny biskop Ewangelsko-lutherskeje krajneje cyrkwje Sakskeje (EVLKS), Tobias Bilz, tutón tydźeń na wizitaciji w cyrkwinskim wobwodźe Budyšin-Kamjenc přebywa. Předwidźane su zdobom serbske stacije. Tak sćěhuje biskop Bilz pjatk popołdnjo přeprošenje předsydy Domowiny, Dawida Statnika, do Serbskeho domu. Na zetkanju wobdźělitaj so zdobom Serbski superintendent Krystof Rummel a předsyda Serbskeho ewangelskeho towarstwa Mato Krygaŕ. Ze zastupjerjemi Serbskeho wosadneho zwjazka wuměni so krajny biskop sobotu popołdnju w Hodźiju, tež so dalši Serbja wobdźěla, sakska krajna cyrkej připowědźa. Mjez nimi su čłonojo Hodźijskeje Bjesady. Wizitacija skónči so z němsko-serbskimi kemšemi njedźelu w dźesaćich w Budyskej Michałskej cyrkwi. Krajny biskop Bilz prěduje, liturgiski nawod superintendent Tilmann Popp a Serbski superintendent Krystof Rummel přewozmjetaj.
Na zetkanja ze serbskimi ewangelskimi křesćanami Hornjeje Łužicy ma Tobias Bilz wosebje wulke wočakowanja, rěka w nowinskej zdźělence.
Washington (dpa/SN). Po měsacy trajacej blokadźe pomocnych srědkow USA na dobro Ukrainy wočakuja w Domje reprezentantow wažne wothłosowanje. Předsyda komory Mike Johnson rjekny, zo wočakuje wotum zapósłancow sobotu wječor. Mócny kontrolny wuběrk je naćisk zakonja wozjewił, wo kotrymž chcedźa wothłosować. Tón wotpowěduje w dalokej měrje dotalnemu zakonjej. Johnson pak je dźěl pomocnych srědkow za Ukrainu na kredit přeměnił.
Lauterbach: Reformu přesadźić
Berlin (dpa/SN). Zwjazkowy minister za strowotnistwo Karl Lauterbach chce najebać dale trajacych diferencow z krajemi planowanu reformu chorownjow spochi přesadźić. Někotre žadanja kaž wottwar běrokratije wón podpěruje, wo nowych předpisach nastupajo kwalitu chorownjow pak wón njediskutuje, politikar SPD rjekny. Přetwar dotalneho systema je „historiska składnosć“, kotruž měli wšitcy wobdźěleni wužić.
Raznišo přećiwo kurjenju