Düsseldorf (dpa/SN). Oficěr zwjazkoweje wobory je póndźelu před wyšim krajnym sudnistwom w Düsseldorfje wuprajił, zo je wón Rusku z wojerskimi informacijemi zastarał. Strach před nuklearnej eskalaciju konflikta w Ukrainje bě jeho pohnuł, 54 lětny doda. Muž je z čłonom AfD. Widejo na platformje TikTok bě jemu w meji 2023 pozdatnje z přičinu, so na ruski konsulat wobroćić a swoju pomoc poskićić. Kotre widejo dokładnje to bě, wón wjace njewě.
Sánchez dale w zastojnstwje
Madrid (dpa/SN). Ministerski prezident Pedro Sánchez swoje zastojnstwo njezłoži. Tole wozjewi wón po pjećoch dnjach wobmyslenja póndźelu. Po wumjetowanjach korupcije swojej žonje napřećo, dyrbješe so Sánchez z prašenjom rozestajeć, hač móže hišće dale knježić. W zdźělence rěka, zo njeda so wón wot kampanje złamać, kotraž chce jeho žonje škodźeć. Hižo wot zašłeje srjedy njebě žane zjawne terminy absolwował.
Prezident přećiwo AfD
Kairo/Tel Aviv/Washington (dpa/SN). W swojich jednanjach wo wójnsku přestawku w pasmje Gaza nadźijeja so wobdźěleni partnerojo hladajo na hrožacu ofensiwu israelskeho wójska w Rafahu na poskitk ze stron islamistiskeje Hamas. Po wčerawšej nowinskej zdźělence US-knježerstwa je „pušćenje wot Hamas zajatych israelskich zastajencow najwjetši zadźěwk po puću k móžnej wójnskej přestawce, kotryž dyrbi so rozrisać“.
Tajki poskitk wójnskeje přestawki na 40 dnjow zastupjerjam Hamas předleži, praji britiski wonkowny minister David Cameron. Delegacija Hamas je jednanja w Kairu wopušćiła a chce so z wotmołwu nawróćić. Nowina Times of Israel zdźěli, zo chce so delegacija Israela dźensa do Kaira na jednanja podać.
Turin/Berlin (dpa/SN). Ministrojo za klimu, energiju a wobswět wodźacych zapadnych industrijnych narodow, su so na zeńdźenju G7 w Italskej na zakónčenje zdobywanja energije z brunicy hač do lěta 2035 dojednali. To piše zwjazkowe hospodarske ministerstwo wčera wječor w nowinskej zdźělence. Němska je so rozsudnje za tajke dojednanje z jasnym datumom zakónčenja zasadźowała.
W lěće 2020 je so zwjazkowe knježerstwo na zakónčenje zdobywanja energije z brunicy zakonsce hač do lěta 2038 zawjazało. Amplowa koalicija je so 2021 na to dojednała, zo zakónčenje „po móžnosći“ hižo 2030 zwoprawdźi. Za brunicowy rewěr w Sewjerorynsko-Westfalskej je tutón termin jasny. W brunicowych kónčinach wuchodnych zwjazkowych krajow je wjetšich wobmyslenjow hladajo na zakónčenje do lěta 2038.
Hladajo na to, zo na lońšej klimowej konferency UN podobny wuslědk móžny njeběše, wopisa britiski statny sekretar za energiju Andrew Bowie dojednanje jako „historiske“.
Mnichow (dpa/SN). Špatne powěsće za elektromobilitu: Dale a mjenje wobydlerjow Němskeje ma wotpohlad, sej přichodny króć elektroawto kupić. Jenož 17 procentow by tole hišće chcyło, institut Allensbach zwěsća, kiž bě naprašowanje w nadawku Němskeje akademije techniskich wědomosćow přewjedł. Lěta 2021 bě jich hišće 24 procentow. Wuslědki su wčera wozjewili. Jedna z přičinow móhła po měnjenju instituta pobrachowaca abo špatna informacija być.
Mjez ludźimi su wulke problemy akceptancy, rjekny Renate Köcher wot Allensbachskeho instituta. Dźěle wobydlerstwa wobhladuja elektromobilitu jara skeptisce. Najwažniše dypki kritiki su wysoke kóšty, starosće snadneje distancy dla a dwěle, zo su elektroawta woprawdźe wobswětej přichilene. „Cyłkownje je widźomne, zo su wobmyslenja chětro stabilne. Jenož dźěl ludźi je změnu techniki na tutym polu minjene lěta zrozumił.“
Berlin (dpa/SN). Załožer awtotwarca Tesla Elon Musk njeje so po přeprošenju předsydki AfD Alice Weidel na rozmołwu wo aktualnym politiskim wuwiću w Němskej hišće přizjewił. Tole je rěčnik Weidel na naprašowanje medijow zdźělił. Stronska a frakciska předsydka AfD bě Muska do swojeho běrowa w Berlinje přeprosyła, ručež ma Musk chwile. Tam chce wona z nim wo podawku w Hamburgu diskutować, dokelž jedna so po jeje słowach wo „tójšto znjeměrnjowacych podawkach“, wona internetnje piše.
Weidel poćahowaše so na internetnu powěsć, w kotrejž reagowaše Musk na kónctydźensku wot islamistow organizowanu demonstraciju w Hamburgu z wjace hač tysac wobdźělnikami. Namołwjeć, knježerstwo powalić, je zawěsće tež w Němskej ilegalne, Musk wo demonstraciji rjekny, na kotrejž žadachu sej wobdźělnicy mjez druhim załoženje kalifata w Němskej. Demonstracija bě wjele kritiki zbudźiła. Politikarjo žadaja sej razniše postupowanje. Wulkopósłanc zjednoćenych arabskich emiratow w Němskej piše: „Njepředstajomne: To su ludźo, kotřiž su w Němskej nowu domiznu našli.“
Njeznaty je na parkowanišću w Budyšinje młodemu mužej – w socialnych medijach jako „Anzeigenhauptmeister“ znatemu – do mjezwoča dyrił. Wón bu lochce zranjeny a medicinisce zastarany. Policija přepytuje pad zranjenja ćěła dla. Hižo dlěši čas wuskušuje 18lětny systematisce wopak parkowacych a informuje policiju. Swoju sobotnišu „akciju“ na parkowanišću běše sam w socialnych medijach připowědźił a tak wjace hač 100 wćipnych přiwabił.
Tři měsacy po swojej diagnozy schorjenja na rak, přewozmje kral Wulkeje Britaniskeje Charles III. zaso zjawne terminy. Zhromadnje ze swojej žonu kralownu Camillu wopyta dźensa centrum za schorjenja na rak, tak připowědźi kralowski palast. Wobaj chcetaj so tam z pacientami kaž tež z medicinskimi specialistami zetkać.
Žitawa (SN/mb). Šěsć njedźel do wólbow europskeho parlamenta je najwjetši čas, so z pozicijemi stronow zaběrać. Tohodla je Sakska krajna centrala za politiske kubłanje (SLpB) pjatk wječor do Žitawskeho „Kronenkino“ na prěni wólbny forum přeprosyła. Předsydźe satiriskeje strony Martinej Sonnebornej běše wječork najskerje přechutny: Připrajił drje wón bě, přišoł pak njeje. Porno „serbskim debatam“ krajneje centrale su w Žitawje wjacori sobudźěłaćerjo Security při zachodźe toboły wopytowarjow kontrolowali. Druhi rynk sylnych muži sej kóždeho kruće wobhlada, kotryž so do žurle poda.
Na derje wobsadźenej žurli běše zymnišo hač wonka na hasy. Najebać to bě nalada dobra. Tež wjele młodostnych je přichwatało. Debata běše takrjec předhra wulkeho sobotnišeho swjedźenja Europy w třikrajowym róžku. Zajutřišim budźe tomu dwaceći lět, zo bu Europska unija do wuchoda rozšěrjena.