Wulki krok
Ideje wědomostnikow pytane
Drježdźany (SN). W Sakskej matej přichodne lěta dwě wulkoslědźenišći nastać. Pod hesłom „Wěda dawa regionje perspektiwy“ stej zwjazkowe ministerstwo za kubłanje a wědomosć a Swobodny stat Sakska wubědźowanje wo wobsahowe wusměrjenje a natwar centrow zahajiłoj. Zwjazkowa ministerska za slědźenje Anja Karliczek, sakski ministerski prezident Michael Kretschmer a sakski minister za wědomosć Sebastian Gemkow (wšitcy CDU) su spočatk tydźenja wotpowědne dojednanje podpisali.
„Mi je wažne, zo strukturnu změnu w němskich wuhlowych kónčinach aktiwnje zmištrujemy a zdobom zakład za produkciju nowych wudźěłkow z modernymi dźěłowymi městnami połožimy“, Karliczek rjekny. Kubłanje, slědźenje a inowacije k tomu přinošuja, zo stej Łužica a srjedźosakski rewěr derje na čas po brunicy přihotowanej a zo wostanjetej atraktiwnej kónčinje, w kotrymajž su ludźo rady žiwi.“
To a tamne (30.11.20)
Listowu wobalku, w kotrejž bě nimale tysac eurow, je šofer na třěše swojeho awta zabył a zhubił, jako wotjědźe. Krótko po tym přizjewi so 57lětny na policajskej straži a přepoda 900 eurow, kiž bě na dróze namakał. Zastojnicy jědźechu z nim na městno namakanki a tam dalše sto eurow a tež 39lětneho wobsedźerja pjenjez nańdźechu. Tón rjekny, zo bě do wotjězda cigaretu kurił a na pjenjezy na třěše zabył. Pjenjezy jemu wróćichu.
Ćěkaceho sobujěduceho wosoboweho awta je policajski pos Ilox našoł. Šofera awta zajachu něšto pozdźišo w toho bydlenju. 26lětny bě ze swojim awtom na A67 pola Raunheima z jězdnje zajěł a do wobhrodźenja twarnišća zrazył. Zhromadnje ze 29lětnym sobujěducym wostajištaj awto stejo a pěši ćeknyštaj. Zastojnicy z psom za nimaj pytaštaj. Ilox sobujěduceho w bliskim lěsu namaka.
Zakazaja plastowe tity
Berlin (dpa/SN). We wobchodach žiwidłow Němskeje njesmědźa wot lěta 2022 žane nakupowanske tity z plasty wjace poskićować. Wotpowědny zakaz je zwjazkowy sejm wčera wobzamknył. Po přechodnym času, kajkiž běchu na žadanje wikowarjow wo šěsć na dwanaće měsacow podlěšili, su lochke plastowe měški, kotrež dóstanješ při kasy, zakazane. Zakaz njepłaći za jara lochke tity we wotrjadach za sad a zeleninu.
Za wotsunjenje do Syriskeje
Berlin (dpa/SN). Zwjazkowy nutřkowny minister Horst Seehofer (CSU) nochce tuchwilu płaćiwy generelny zakaz ćěkancow do Syriskeje wotsunyć po 31. decembru wjace podlěšić. Wón chcył so na konferency nutřkownych ministrow za to zasadźeć, wotsunjenje do Syriskeje pruwować, jedna-li so wo skućićelow a tak mjenowanych wohrožowarjow, rjekny Seehofer. Zakaz wotsunjenja běchu 2012 wobzamknyli a wospjet podlěšili. Mjeztym je wobydlerska wójna w Syriskej w najwjetšim dźělu kraja nimo.
Socialne temy w srjedźišću
Po wšej Hessenskej su dźensa we wobłuku krajneho akciskeho dnja ...
180 miliardow eurow nowych kreditow
Trump zwólniwy Běły dom wopušćić
Edeka nowe naprawy raznje kritizuje
Hamburg (dpa/SN). Najwjetši wikowar žiwidłow Němskeje Edeka je nowe naprawy koronapandemije dla w drobnowikowanju raznje kritizował. „Mamy wobmjezowanje ličby kupcow we wobchodach z wjace hač 800 kwadratnymi metrami předawanskeje płoniny za kontraproduktiwne a njezrozumliwe“, rjekny šef Edeka Markus Mosa w Hamburgu. Wulki nawal kupcow runje w hodownym času njehodźi so tak zmištrować. Pokazka politiki, zo měli ludźo nakupowanje na wjacore dny rozdźělić, tež dale njepomha, dokelž činja to kupcy hižo wot časa prěnjeho lockdowna. Dalše rozdźělowanje kupcow na tym ničo njezměni, Mosa rjekny.
Nimo toho wobzamknjenje fairne wubědźowanje haći, šef Edeka skorži. Wobchody z tejkami, hdźež kupcow posłužuja, kaž Edeka, maja jasne njelěpšiny porno ryzy samoposłužowarnjam, dokelž kupcy w nich dlěje přebywaja. „To drje přichodnje hišće wjace wobchodow na samoposłužowanje z tunimi tworami přestaja“, wikowar wěsćeše.
To a tamne (27.11.20)
Paducha žwjenkačkowych awtomatow lepiła je policija w badensko-württembergskim Brühlu. Žona bě wobkedźbowała, kak 72lětny spyta, awtomat wotšrubować a informowaše policiju. Zastojnicy namakachu w awće rentnarja wosom dalšich kradnjenych awtomatow, nimo toho grat a tójšto klučow. 72lětny nochcyše dokładnje rjec, wotkal awtomaty pochadźeja. Policisća nastroje sćazachu, muž smědźeše hić.
Mobilny błyskač sobu wzał je šofer wosoboweho awta w Sakskej Šwicy. Po tym zo bě jeho nastroj w Struppenje z přewulkej spěšnosću lepił, 52lětny wospjet při błyskaču nimo jědźeše a aparat skónčnje sobu wza. Jako jeho sobudźěłaćer krajnoradneho zarjada narěči, muž wotjědźe. Policija nětko padustwa dla přepytuje. Błyskač zastojnicy pozdźišo w bydlenju muža namakachu.
Berlinska SPD woli nawodow
Berlin (dpa/SN). Po tym zo dyrbjachu stronski zjězd koronapandemije dla dwójce přestorčić, chce Berlinska SPD jutře a sobotu Franzisku Giffey (42) a frakciskeho šefa Reada Salehja (43) digitalnje za noweju předsydow wuzwolić. Dotalny předsyda Michael Müller (55), knježacy měšćanosta, nochce wjace nastupić. Wón kandiduje klětu za zwjazkowy sejm. Noworjadowanje Berlinskeje SPD planuja hižo wot spočatka lěta. Strona bědźi so z woteběracej nahladnosću w stolicy.
Tójšto mortwych w Jendźelskej
London (dpa/SN). Z nimale 700 smjertnymi padami w běhu dnja je ličba na koronawirus zemrětych we Wulkej Britaniskej najwyši staw wot spočatka meje docpěła. Statistiski zarjad je wčera 696 smjertnych padow přizjewił. Při wšěm chcył premierminister Boris Johnson po měsacu trajacych wobmjezowanjach z regionalnymi rjadowanjemi na přiběrace ličby reagować. Wulka Britaniska liči z wjace hač 65 000 mortwymi k wot koronapandemije najbóle potrjechenym krajam.
Biden namołwja do boja
