Sebastian Grubert, FDP
1Mnozy ludźo w regionje drje serbske nałožki kaž ptači kwas swjeća, njewědźa pak, zo jedna so při tym po pochadźe wo serbski nałožk. Dyrbjeli spytać w šulach zaso wjac wažnosće na regionalnosć kłasć, zo njeby so naša kultura w njewědźe zhubiła.
2 + 3Njerozumju kónc wužiwanja jeničkeho energijoweho nošerja, kotryž mamy w Němskej we wulkej měrje k dispoziciji. Strukturna změna so nam jenož poradźi, hdyž planowanja pospěšimy a tež raz trochu wokoło róžka myslimy. Awtodróhi a elektrifikowane železniske zwiski žane dźěłowe městna a žane tworjenje hódnotow do regiona njepřinjesu. Prašam so tuž, kak by hladajo na demografisku změnu z kompetencnym centrumom za hladanje było? Abo bychmy-li na wěsty čas nowozałoženym předewzaćam přemysłowy dawk spušćili, a tak startup-firmy do kónčiny wabili. Wosebite hospodarske pasmo by, tež hdyž je wone hladajo na EU jeno ćežko zwoprawdźomne, zawěsće dobry zakład było, přichodnje dosć předewšěm atraktiwnych dźěłowych městnow we Łužicy zasydlić a zachować.
Thomas Pilz, Zwjazk 90/Zeleni
1Serbska rěč a kultura stej Saksku sobu formowałoj. My Zeleni podpěrujemy wšitke prócowanja, serbšćinu wšědnje, w medijach, zarjadnistwje a w kulturje žiwu dźeržeć a dale wuwiwać. Chcemy serbsku pěstowarsku a šulsku syć zawěsćić a poskitk wučby serbšćiny za wšitke generacije rozšěrić. Při tym měli tež nowe metody za digitalne a analogne (dalno)wuknjenje wužiwać.
2Strukturna změna je wulka šansa. Je wažne do strukturneje změny zapřijeć nazhonjenja minjenych 30 lět. To w prěnim rjedźe rěka, zo maja so wobydlerjo na nowowunamakanju Łužicy sobu wobdźělić. Ludźo, kotřiž maja tu swoju domiznu, su najwjetši potencial, najwažniša resursa, kotruž za a w změnje mamy. Zasadźam so za to, zo koncepty změnow znowa jenož njenakupujemy, ale zo zhromadnje z wobydlerjemi Łužicu wuwiwamy.
Siegmund Hänchen, Swob. wolerjo
1Tradicije a kultura, kotrež su ze serbskej rěču wusko zwjazane, mamy zachować a naslědnje spěchować. Wone su charakteristiske wobstatki cyłeje Łužicy a pokazuja na mnohotnosć w Sakskej. Kaž dotal měło spěchowanje wobšěrne a zdobom na zaměr wusměrjene być, najlěpje wot zažneho dźěćatstwa. K tomu słuša na potrjebu wusměrjene wu- a dalekubłanje kubłarjow a pedagogow. Tež zhromadne dźěło ze Serbami w Delnjej Łužicy mam za spěchujomne a polěpšomne.
2Łužica je wot politiskeho přewróta wobstajnje we wosebitej strukturnej změnje, kotraž je předewšěm ze stratu industrijnych dźěłowych městnow a tak z dalšim woteběranjom wobydlerstwa zwjazana. Tele wuwiće móžachmy zadźeržeć. Runje we wjesnych kónčinach su sej wobydlerjo minjene 30 lět z wulkej prócu žiwjenjahódnu wokolinu zdźěłali.
Roberto Kuhnert, AfD
Tež na wjackrótne naprašowanje ze stron redakcije Serbskich Nowin njeje kandidat AfD ani reagował ani na štyri prašenja wotmołwił.
Fota: z wólbneho materiala kandidatow
To a tamne (15.08.19)
Wo swojoraznu turistisku atrakciju bohatši budu bórze w Berlinje: Tam změja hosćo stolicy składnosć, so zhromadnje z wobydlerjemi w parkach wo porjadk starać. Tak chcedźa turistow za łahodny turizm sensibilizować, kaž zamołwići měšćanskeho dźěla Pankow zdźěleja. Podobne akcije w Edinburghu, Parisu, Barcelonje a Amsterdamje žněja pječa dobry wothłós. Nazhonjenja wuča, zo sej wobdźělnicy „dožiwjenje, so jako dźěl města čuć móc“, jara waža, w zdźělence rěka.
Na wšě 40 ćeknjenych koni su policisća w Hannoveru popadnyli. Skoćata běchu wčera z pastwy w měšćanskim dźělu Bothfeld twochnyli. Prawdźepodobnje njebě płót w porjadku był. Po informacijach policije trjebachu zastojnicy cyłu hodźinu, doniž njeběchu wšitke konje zaso na swojej kopli. Wobsedźerjo su policistam při akciji pomhali.
Z płachtakom do Ameriki
Plymouth (dpa/SN). Wulka jězba po Atlantiku móže so započeć: Aktiwistka na dobro klimy Greta Thunberg chce so dźensa z płachtakom z Wulkeje Britaniskeje do New Yorka nastajić. Profijowaj płachtakowarjej Boris Herrmann a Pierre Casiraghi powjezetaj 16lětnu młodostnu ze Šwedskeje přez „wulki hat“. Wotjěć chcychu popołdnju. Špatneho wjedra dla pak njebě wuzamknjene, zo dyrbja wjacore hodźiny čakać. Jězba traje něhdźe dwaj tydźenjej.
Hospodarstwo wosłabjene
Wiesbaden (dpa/SN). Němske hospodarstwo je so w druhim kwartalu po posudku hospodarskich fachowcow jasnje wosłabiło. Ekonomojo z tym liča, zo je nutřkokrajny bruttoprodukt najwjetšeho europskeho ludoweho hospodarstwa přirunujo ze spočatkom lěta wo 0,1 procent woteběrał. K tomu přinošowali su tež mjezynarodne wikowanske konflikty, kotrež na eksport orientowane němske hospodarstwo wosebje haća, dokelž su kupcy přiběrajcy znjeměrnjeni.
Wopory wopominali
Před Slepjanskej ewangelskej cyrkwju wopominachu wčera wječor ...
Heiko Maas: Ciwilnu ludnosć lěpje škitać
New York (dpa/SN). Škit ciwilneje ludnosće w konfliktach bě tema posedźenja Bjezstrašnostneje rady UNO, na kotrymž je so zwjazkowy wonkowny minister Heiko Maas wčera w New Yorku wobdźělił. Bě to zdobom zazběh wjacednjowskeje jězby politikarja SPD po Sewjernej Americe, kotraž powjedźe jeho tež do kanadiskeho Toronta. Maas bě póndźelu noweho defekta w knježerstwowym lětadle dla ze zapozdźenjom do New Yorka wotlećał, dokelž dyrbješe do druheje mašiny přelězć.
Němska je wot 1. januara dwě lěće z čłonom Bjezstrašnostneje rady. Ze swojim wobdźělenjom chcył Heiko Maas europske zhromadne dźěło z najwažnišim gremijom UNO sylnić, kaž rjekny. Pólska radu tuchwilu nawjeduje.
Dźěćom potrěbnych pomhać
Berlin (dpa/SN). Dźěćom hladanja potrěbnych staršich chcedźa přichodnje pomhać. To předwidźi naćisk zakonja, kotryž je zwjazkowe knježerstwo dźensa wobzamknyło. Njedosahaja-li pjenjezy potrěbnych a srědki hladanskeho zawěsćenja, dyrbja dźěći dotal připłaćić. To ma přichodnje hakle wot lětneje bruttozasłužby 100 000 eurow tak być. Tajka wolóžaca pomoc je „dawno trěbna“, rjekny zwjazkowy minister za dźěło Hubertus Heil (SPD) nowinarjam.
Socialny zwjazk VdK nowy zakoń zasadnje wita, dokelž wón staršim ludźom z ćežkeho połoženja pomha, prezidentka Verena Bentele rozłoži. „Mnozy njeńdu do starownje – byrnjež jich dźěći doma wjace porjadnje zastarać njemóhli –, zo njebychu dźěćom z přidatnej ćežu byli.“ Komuny liča z přidatnymi wudawkami wjacorych miliardow eurow a skedźbnjeja na princip solidarity w socialnym zakoniku. Hłowny jednaćel zwjazka městow a gmejnow Gerd Landsberg praji: „Zasadnje je přicpějomne, zo sej dźěći a starši mjez sobu pomhaja. To měło tak wostać.“
Nětko z mjenami
Choćebuz (HA/SN). Kaž Serbske Nowiny wčera rozprawjachu, je Domowinska župa Delnja Łužica šěsć kandidatow za nowu Radu za naležnosće Serbow w Braniborskej namjetowała. Su to Uta Henšelowa, nawodnica Šule za delnjoserbsku rěč a kulturu w Choćebuzu, Wylem Janhoefer, župan župy Delnja Łužica, Birgit Kaufhold z Grodka, kotraž je zdobom kandidatka Lěwicy za nowy braniborski sejm, Delia Münchowa, mějićelka krawcownje w Žylowje, Katrin Šwjelina, přistajena Domowiny, a Dieter Freihoff, dotalny čestnohamtski społnomócnjeny za serbske naležnosće we wokrjesu Dubja-Błóta. Namjetowani chcedźa so nětko zjawnje předstajić, mjez druhim je w septembrje wólbny forum w Choćebuzu planowany. Hižo 3. septembra budźe w Gołbinje (Gulben), gmejna Gołkojce, serbski wječork na temu „Rěč a politika“.
Kaž wólbny wuběrk zdźěli, je so dotal 360 zajimcow do wolerskeje lisćiny zapisać dało, štož je tež hišće hač do 21. septembra móžno. Tydźeń pozdźišo potom maja wšitke podłožki listowych wólbow wuběrkej předležeć.
