Plauen (dpa/SN). Sakska a Bayerska budźetej w boju přećiwo kriminaliće w pomjeznej kónčinje k Čěskej přichodnje wušo hromadźe dźěłać. Wotpowědne zrěčenje staj nutřkownaj ministraj wobeju krajow Roland Wöller (CDU) a Joachim Herrmann (CSU) wčera w vogtlandskim Plauenje podpisałoj. Zhromadnje ze zastupnikami zwjazkoweje policije wote­wrě­štaj tam nowy pytanski a kompetencny centrum „Vogtlandska“, hdźež ma­ja naprawy policije w boju přećiwo pomjeznej kriminaliće koordinować.

Kooperaciju mjenowaneju swobodneju statow běchu na zhromadnym posedźenju sakskeho a bayerskeho krajneho knježerstwa w meji wobzamknyli. Pjeć dypkow wopřijacy program rjaduje zhromadne dźěło přećiwo wikowanju z drogami, přećiwo pašowanju kradnjenych awtow a ludźi, přećiwo wikowanju z ludźimi a ranjenju zakonja wo brónjach.

Pólska wopomina 75. róčnicu Waršawskeho zběžka

Waršawa. 75. róčnica Waršawskeho zběžka je dale wusahowaca tema w pólskich medijach a wšej towaršnosći. Wčera po­poł­dnju w pjećich bě zjawne žiwjenje na mjeń­šinu zlemjene – to wšitcy mjelčicy wokomik wopominachu, jako w tym času 1944 zběžk přećiwo němskim okupantam wudyri.

We Waršawje wotměchu so wčera wjacore wopominanske zarjadowanja, na ko­trychž so tež němski wonkowny minister Heiko Maas (SPD) wobdźěli. Tak poby wón mjez druhim při wopomnišću zběžka w měšćanskim dźělu Wola, hdźež jednotki SS wosebje surowje přećiwo ciwi­li­stam zachadźachu a na wšě 50 000 ludźi morichu. Maas podšmórny njesměrne horjo, kotrež bě nacionalsocialistiska Němska Pólskej načiniła, a prošeše ju wo wodaće, štož medije dokładnje registrowachu. Maas rjekny: „Hańbuju so za to, štož su wam w mjenje Němskeje načinili, a hańbuju so za to, zo smy winu předołho zatajeli. Zdobom sym dźakowny, zo móžemy sej 75 lět po tym kruće dowěrić.“

Berlin (dpa/SN). Přemóžaca wjetšina wobydlerjow Němskeje po reprezentatiwnym naprašowanju atomowe brónje USA w Němskej wotpokazuje. Wuslědk stu­dije slědźenskeho instituta Kantar w nadawku Greenpeace su wčera wozjewili, krótko do skónčenja zrěčenja INF wo zakazu na kraj wjazanych atomowych raketow srjedźneje distancy. Něhdźe 86 procentow prašanych sej žada, zo měło zwjazkowe knježerstwo składowanje atomowych raketow USA w Němskej zakazać. Jenož wosom procentow je za to, tajke­ brónje tu zaměstnić. Na wojerskim lětanišću Zwjazkoweje wobory Büchel w Eifeli leži po njewobkrućenych informacijach 20 atomowych bombow USA. W padźe wójny bychu je němske lětadła wotćisnyć dyrbjeli. Zrěčenje INF z lěta 1987 běchu USA spočatk februara wupowědźili, wumjetujo Ruskej, zo dojednanje z nowymi raketami rani. Na to je tež Ruska zrěčenje wupowědźiła. Doba wupowědźenja dźensa wotběži. Mjeztym je Ruska USA warnowała, nowe rakety w Europje nastajić. W tym padźe by Ruska swoje rakety njedaloko mjezy USA nastajiła, na přikład na Kubje abo we Venezueli.

Při policajskej kontroli sćazane słódkosće smědźa sej chowancy dźěsćownje w Passauwje słodźeć dać. W aprylu běchu wobchadni policisća na awtodróze w Bayerskej w dwěmaj awtomaj dohromady 15 nakupowanskich titow połne słódkosćow namakali. Wosoby w awtomaj běchu za­stojnikam w zwisku z kradnjenjom hižo znate. Dokelž njemóžachu pakostnicy dopokazać, zo běchu słódkosće kupili, je zastojnicy sćazachu, njemóžachu pak wobsedźerja plackow zwěsćić. Tuž su słódkosće – ně­hdźe sto kilogramow šokolody a gumijowych barikow – nawodnicy dźěsćownje přepodali.