Stróža (SN). Mjeztym hižo 18. raz wotměja so sobotu, 12. septembra, nazymske přirodowe wiki biosferoweho rezerwata Hornjołužiska hola a haty. Wot 10 do 17 hodź. přewjedu na terenje biosferoweho zarjadnistwa w Stróži pola Hućiny zaso pisane wiki. W srjedźišću steja tónraz stare družiny domjaceho skotu. We wowčerni wuhladaja wopytowarjo wowcy a kozy. Nimo toho prezentuja tam wikowarjo swoje poskitki kołowokoło wołmy a wotpowědneje drasty. Dalši skót wot kokoše hač ke konjej budźe na swjedźenskej łuce, hdźež informuje zarjadnistwo biosferoweho rezerwata wo swojim prócowanju, stare družiny domjaceho skotu po móžnosći zachować.