Wo nowym Slepjanskim němsko-serbskim šulskim centrumje hižo dołho rěča, a poprawom měješe wón mjeztym nimale hotowy być. Nětko stej gmejna a koncern Vattenfall znajmjeńša zrěčenje wo financowanju podpisałoj.

Slepo (AK/SN). Gmejna Slepo prócuje so dale wo twar noweho němsko-serbskeho šulskeho centruma. Tole podšmórny wjesnjanosta Reinhard Bork (CDU) na wčerawšim posedźenju gmejnskeje rady. Energijowy koncern Vattenfall chce projekt z maksimalnje 20,5 milionami eurow sobu financować. Swobodny stat Sakska přewostaji gmejnje jako twarskemu knjezej dalše spěchowanske srědki. Radźićeljo wčera wobzamknychu, kruty poskitk Vattenfalla přiwzać.