Program mjez reju a dźiwadłom w Kamjentnym domje

štwórtk, 07. januara 2016
artikl hódnoćić
(0 )
Rejwarki Korzymskeho ansambla  TanzART skutkuja sobu w programje „aufTakt“, kotryž  budźe zajutřišim a njedźelu w Budyšinje widźeć.  Foto: Uwe E. Nimmrichter Rejwarki Korzymskeho ansambla TanzART skutkuja sobu w programje „aufTakt“, kotryž budźe zajutřišim a njedźelu w Budyšinje widźeć. Foto: Uwe E. Nimmrichter

Budyšin (SN). „aufTakt – dźiwadło rejuje“ rěka hesło programa, z kotrymž zahaji Budyski Kamjentny dom kónc tydźenja swoje lětuše poskićenja. Na předstajenjomaj sobotu, 9. januara, w 19 hodź. a nazajtra w 15 hodź. skutkuja sobu holcy a hólcy rejwanskeho studija Wendisch a Korzymskeho ansambla ­TanzART, breakdancery skupiny Senftown Collec­tive kaž tež dźěći a młodostni z inscenaciju „Rjadowniska jězba 2050“.

Rejwanske studijo Wendisch prezentuje choreografije ze swojeho aktualneho programa, kotryž wopřijima klasiske elementy runje tak kaž jazz, tango a afriske reje. Korzymski ansambl pokaza wurězki ze swojeje rejwanskeje show „India Masala“. Z choreografijemi a w originalnych pisanych kostimach wotwjedu rejwarki a rejwarjo publikum do bohateje a mnohostronskeje indiskeje kultury. Lubowarjo breakdanca pak smědźa so na runjewon ­akrobatiske poskićenja wjeselić. K zakónčenju programa předstaji nimale 40 dźěći a młodostnych swoju rejohru wo ­rjadowniskej jězbje, z kotrejž dóstanu přihladowarjo futuristiski dohlad do lěta 2050.

Zastupne lisćiki za wobě kónctydźenskej předstajeni dóstanu zajimcy w předpředani za wosom eurow direktnje w Kamjentnym domje abo online pod www.tixforgigs.com. Zastup při wječornej kasy płaći dźesać eurow, potuńšeny je wón wosom eurow. Dźěći hač do dwa­naće lět płaća pjeć eurow.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND