Budyšin (SN). Za jeje angažement na dobro Černobylskich dźěći we wšěch lětach po přewróće je towarstwo Budyski měr minjenu sobotu Margaretu Nowakowu ze sprjewineho města na žurli Serbskeho muzeja z Budyskim měrowym mytom počesćiło. Wot lěta 1990 stara so wona wo to, zo móža holcy a hólcy z běłoruskeho Černobyla bjezstarostne prózdniny w Hornjej Łužicy přežiwjeć. Dźakowano jeje zasadźenju je tež někotražkuli serbska swójba w měsće Černobylske dźěći hospodowała abo projekt z pjenježnym darom podpěrała. Za to dźakowachu so hibićiwej rentnarce z mytom kaž z mólbu. Z tym zwjazane 150 eurow chce 85lětna za přichodny prózdninski přebytk Černobylskich dźěći w Budyšinje wužiwać. Wjace hač 250 dźěći z regiona Buda-Košeljowo bě dotal w sprjewinym měsće z hosćom.