Pančicy-Kukow (mbr/SN). Hižo 23. raz wotewrěchu minjenu njedźelu sezonu w Pančičanskej klóšterskej zahrodźe, kotraž je w nošerstwje Křesćansko-socialneho kubłanskeho skutka (CSB). Na rjanym słónčnym dnju witaštaj jednaćel Peter Neunert a zapósłanc Europskeho parlamenta Hermann Winkler (CDU) něhdźe 800 wopytowarjow. Dokelž je zahroda trochu škitana, jich tež sylny wětřik njemyleše.
Z dobrej tradiciju je, zo sadźa tón dźeń štom lěta. Lětsa je to pózdnja lipa. Tutón nadawk přewzaštaj abatisa klóštra Marijineje hwězdy Philippa Kraft a Hermann Winkler. Do toho poda Holm Karraß ze statneho zawoda sakski lěs zajimawe informacije k štomej a doda, zo je lipowe łopješko zdobom tež znamjo Serbow. Sadźenje štoma wobrubi hudźbna skupina KremserMugge z Połčnicy.