Na Budyskim hamtskim sudnistwje bě dźensa dopołdnja nanuzowane přesadźowanje Worklečanskeho hosćenca „Ke kupowemu hatej“. Pjenjezy poskićił pak za njón nichtó njeje.
Budyšin/Worklecy (SN/MWj). Marlies Hüllowa wostanje dale wobsedźerka Worklečanskeho hosćenca. Při dźensnišim nanuzowanym přesadźowanju w Budyšinje njebě nichtó z horstki přitomnych zwólniwy, pjenjezy za njón poskićić. Kaž sobudźěłaćer sudnistwa Andreas Amft rozłoži, njeje to ničo wosebite, zo so jednanje nachwilnje zastaji. Rukowaćeljo, w tym padźe Budyska Ludowa banka a Wojerowski financny zarjad, matej nětko próstwu zapodać, nowe jednanje zahajić. Najpozdźišo za poł lěta – skerje prjedy – postaja nowy termin, praješe Amft.