Na wobydlerskej zhromadźiznje wizije do přichoda předstajili
Wojerecy (AK/SN). Nowoměšćanski dźěl Wojerec ma přichodnje powabne městno k bydlenju za swójby a seniorow być. „Trjebamy atraktiwne nowe město, dokelž su tu wažne zarjadnišća kaž Łužiska hala, Łužiski center, kupjel a klinikum“, rjekny wyši měšćanosta Stefan Skora (CDU) wčera na wobydlerskej zhromadźiznje před 200 připosłucharjemi. Tam předstajichu wuwićowy koncept města hač do lěta 2030.
Ličba wobydlerjow budźe tež přichodnje dale woteběrać. Hižo dźensa je 40 procentow wšěch ludźi w nowym měsće staršich hač 65 lět. Jenož dwanaće procentow je 19 do 35 lět, rozłoži Nico Hoffmann z Lipšćanskeje firmy DSK. Wot lěta 1997 su za něhdźe 30 milionow eurow dohromady 9 000 bydlenjow zwottorhali. Přichodne lěta ma dalšich 6 000 bydlenjow slědować. Dźensa bydli w nowym měsće 19 000 wobydlerjow, w lěće 2030 budźe drje jich jeno hišće 11 000.
