Kóždy zhromadny dźeń je wjeselo

póndźela, 11. julija 2016
artikl hódnoćić
(0 )
Serbski superintendent Jan Malink je minjeny pjatk Latkec mandźelskimaj w Přiwćicach k železnemu kwasej gratulował a jimaj bohate Bože žohnowanje wupřał.  Foto: SN/Maćij Bulank Serbski superintendent Jan Malink je minjeny pjatk Latkec mandźelskimaj w Přiwćicach k železnemu kwasej gratulował a jimaj bohate Bože žohnowanje wupřał. Foto: SN/Maćij Bulank

W Budyšinkskej cyrkwi su wčera njewšědny jubilej swjećili: Znaty ewangelski Serb Kurt Latka a jeho mandźelska Marka­ z Přiwćic buštaj wot fararja na wotpočinku Handrija Gudera k železnemu kwasej swja­točnje požohnowanaj. Duchowny jeju derje znaje, wšako je bratr přichodneho syna Latkec mandźelskeju. Po požohnowanju móžeštaj zbožownaj mandźelskaj, kotrajž mataj tři dźěći, wosom wnučkow a pjeć prawnučkow, w swójbnym kruhu radostnje swój rědki jubilej swjećić.

Minjeny pjatk před 65 lětami bě Malešanski farar Pawoł Albert Kurta Latku a Marku Běrkec, dźowku z ratarskeje swójby ze susodnych Plusnikec, zwěrował. 65 lět staj wonaj, kotrajž lětdźesatki pilnje w ratarstwje a na prodrustwje dźěłaštaj, w Přiwćicach zbožownje zhromadnje žiwaj. Nimale tři lětdźesatki bě jubilar na prodrustwje zamołwity za plahowanje zeleniny. Jubilarka je jako rentnarka jara ćežku chorosć přetrała. „Tuž so nad kóždym zhromadnym dnjom wjeselimoj“, praji 91lětny jubilar. Wón bě so ­jako druhe dźěćo serbskej ewangelskej ratarskej swójbje w Přiwćicach narodźił, dyrbjěše jara młody do němskeho ­wójska a wróći so 1948 ze sowjetskeje wójnskeje jatby w Uralu. Po přewróće je Kurt Latka z dźowku Margit Guderowej a jeje mandźelskim hišće raz wone kónčiny na mjezy Europy k Aziji wopytał. ­Sydom króć dojědźe sej tež do Kaliningradskeho regiona, do bywšeje Narańšeje Pruskeje, zo by tam Ruskich Němcow podpěrał.

Jubilaraj staj swěrnaj kemšerjej, wopytujetaj lětdźesatki Serbski cyrkwinski dźeń a dalše ewangelske zetkanja. Kurt Latka bě lětdźesatki čłon cyrkwinskeje rady, 22 lět je Serbow jako synodala na synodźe Ewangelsko-lutherskeje krajneje cyrkwje Sakskeje zastupował a je Serbske ewangelske towarstwo sobu załožił. Pilnje a derje pisaše tež do měsačnika Pomhaj Bóh a na 20 lět do Protyki. Swojeho wučerja a kantora Arnošta Holana je w Protyce wopisał, tohorunja ródnu wjes Přiwćicy, dalše wsy a mnohe stawi­zniske zajimawostki.

Přejemy železnymaj mandźelskimaj strowotu a wšo najlěpše na dalše zhromadne lěta. Manfred Laduš

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND