Nowe sportnišćo wyše wosadneje cyrkwje je drje najwobšěrniše předewzaće, kotrež je Wotrowska wjesna rada z njeličomnymi pomocnikami minjene lěta zeskutkowniła. Nětko maja tam samo hrajkanišćo.
Wotrow (SN/MWj). Po wjacorych lětach prócowanja su sej we Wotrowje wulki són spjelnili. Tam maja nětko zjawne hrajkanišćo. Po wčerawšich dopołdnišich kemšach je farar Daniel Dzikiewicz požohnowa. Swjatočnosć je holča šola hudźbnje wobrubiła.
Hrajkanišćo su sej před lětomaj z klóstra Marijineje hwězdy w Pančicach-Kukowje do Wotrowa přiwjezli. W klóštrje je hižo njetrjebachu, zo pak bychu je preč ćisnyli, bě přeškoda. Tuž Wotrowčenjo jednotliwe dźěle wottwarichu, je domoj dowjezechu a najprjedy raz na farskim dworje składowachu. We wulkej Weclichec bróžni nastroje w běhu časa krok po kroku sporjedźachu, přetwarichu, wobarbichu a je skónčnje na ležownosći na kromje noweho sportnišća bjezposrědnje při farskej zahrodźe nastajichu. Ležownosć słuša cyrkwi, gmejna pak ju wotnaja.
