Nakupowanska nóc Romantica 5. nowembra w Budyšinje budźe najwjetše zarjadowanje wikowarjow wuchodneje Sakskeje. Štóž chce při dundanju po měsće něšto słódne zjěsć a při tym najwšelakoriše zajimawe poskitki dožiwić, njesměł termin skomdźić.

Budyšin (SN/MWj). Štož su njedawno w Kamjencu a minjeny kónc tydźenja w Kulowje přewjedli, změja 5. nowembra tež w Budyšinje. Potom přeproša sprjewine město na 14. nakupowansku nóc Romantica. Wot 16 do 22 hodź. chce so něhdźe 200 wobchodow w nutřkownym měsće ze swojeje romantiskeje stronki prezentować a pod hesłom „Toura sonow“ kupcow z wosebitym flairom a njewšědnymi idejemi překwapić. Wječor wuwjercholi w 22.30 hodź. z fulminantnej wohnjostrojowej show. Najlěpje widźiš ju z Mosta měra, kotryž budźe wěsty čas za wobchad zawrjeny, zdźěli cityjowa managerka Gunhild Mimuß dźensa na nowinarskej rozmołwje. W nadawku nutřkoměšćanskeho towarstwa Gunhild Mimuß nakupowansku nóc Romantica hłownje přihotuje.