W přitomnosći abatisy klóštra Marijineje hwězdy Philippy Kraft, dalšich rjadniskich sotrow a hosći je farar Tomaš Dawidowski wčera dopołdnja nowonatwarjenu bróžnju na Kukowskim klóšterskim dworje požohnował.
Pančicy-Kukow (SN/mwe). Ze zhromadnym paćerjom, kěrlušemi a žohnowanjom su wobydlerjo z Pančic-Kukowa, nawodnistwo klóštra Marijineje hwězdy kaž tež rjemjeslnicy nowotwarjenu bróžnju za ratarske mašiny poswjećili. Na małym swjedźenju spominachu na to, zo bě 3. oktobra 2009 něchtó nawječor bróžnju zapalił, na čož so twarjenje ze składom słomy a Schlafkec wowčernju dospołnje wotpali. Policija njezamó zapalerja bohužel wuslědźić.
„Dźensa, sydom lět po zapalerstwje, pak móžemy so wjeselić a dźakować. Naš wosebity dźak słuša sotram klóštra Marijineje hwězdy z režiju našeje abatisy Philippy Kraft, kotřiž su znowazarjadowanje tutoho rjaneho a wažneho twarjenja zmóžnili“, inspektor klóšterskeho kubła Frank Weigel při witanju podšmórny. Wšako je klóšter trěbne financne srědki přez swój ratarski zawod přewostajił.
