Ralbicy (aha/SN). „Je z rjanej tradiciju, a to dyrbjeli sej naši wosadni wobchować, zo słuša k prawej kermuši dostojna Boža mša“, wuzběhny wčera po dopołdnišich kemšach w Ralbičanskej wosadnej cyrkwi 82lětny Konječan Jurij Grul. Wón chwaleše sej swjatočne wobrubjenje přez Ralbičanski pozawnowy orchester pod nawodom Joachima Dučmana kaž tež přez cyrkwinski chór Lilija z dirigentku Bognu Korjeńkowej. Farar Šćěpan Delan witaše na kermušnu Božu mšu tež bywšich wosadnych, kotřiž mjeztym za mjezami Łužicy bydla abo dźěłaja.
Dawno je w Delanach z tradiciju, zo tón kónc tydźenja reje přewjeduja. Tomu bě lětsa w Ralbicach, Konjecach a po štyrjoch lětach tež zaso w Smjerdźacej tak. Tamniši kulturny dom bě z młodymi a něšto staršimi ludźimi derje pjelnjeny a z live-hudźbu kapały Privileg tam hač do nocy swjećachu.
