Pytaja kupca za „Krónu“

wutora, 06. decembera 2016
artikl hódnoćić
(0 )

Zo ma so Budyska „Króna“ předać, je wyši měšćanosta po wšěm zdaću wědźał. To jemu měšćanska rada za zło bjerje. Ahrens znapřećiwja, zo zjawna diskusija jenož płaćiznu dowysoka ćěri.

Budyšin (CK/SN). Budyska měšćanska hala Króna ma so předać. „Zo město na njej žadyn zajim nima, njetrjechi.“ Z tymile słowami reagowaše wyši měšća­nosta Alexander Ahrens (njestronjan) na zašłym posedźenju měšćanskeje rady na wuprajenje wobsedźerja imobilije. Tón bě po wšěm zdaću zaćišć zbudźił, zo je­ to zamołwitym w radnicy wšojedne. Tomu pak tak njeje, praji Ahrens. „Za město­ je to jara zajimawy teren. My so zajimujemy, ale nic za tule płaćiznu“, wón podšmórny.

Wulki areal mjez Hornčerskej a Kamjentnej słuša Berlinskej Onnasch-skupinje, kotraž chce swoje Budyske wobsydstwo wotbyć. Su to „Króna“ z wulkej žurlu, susodne parkowanišćo, hotel „Best Western“ a dalše imobilije. „Woni spytaja hižo wjacore lěta płoniny wotbyć, njejsu pak dotal ani jeničku předali“, Alexander Ahrens wuswětli. Wón je „zadźiwany, zo někotři radźićeljo měnja, temu do zjawnosće njesć dyrbjeć“. Do posedźenja su wjacore frakcije nawodnistwo radnicy kritizowali, zo bě tam planowana předań znata, radźićelow pak informowali njeběchu. Jedna so wo „filejowy kusk z móžnosćemi wuwića“, tohodla dyrbi město jednać, rěka ze stron radźićelow. Připowědźeny namjet wjacorych frakcijow pak na zašłym posedźenju měšćanskeje rady zapodali njejsu.

Za čas NDR bě „Króna“ znata za koncerty, za swjedźenje k dnjej žonow a dalše, za młodźinske swjećby a reje. Po přewróće je tam wěsty čas Němsko-Serbske ludowe dźiwadło hrało, jako jeho hłowny dom saněrowachu. Nětko tam jeno sporadisce diskoteki přewjeduja. Žurla dyrbi so nuznje ponowić.

Po wuprajenju Alexandera Ahrensa město z wobsedźerjom rozmołwy wjedźe, ale w tak zažnym stadiumje njeje žaneje přičiny, wo temje zjawnje diskutować. „To wjedźe­ jenož k tomu, zo móže wobsedźer płaćiznu dowysoka ćěrić.“ Za 4,5 milionow eurow su „Króna“, parkowanišćo a někotre susodne imobilije w pakeće w poskitku. „Za město su tajke sumy njepředstajomne.“­ Wyši měšćanosta by so za wobsedźerja wjeselił, by-li zajimc zwólniwy był, tule sumu zapłaćić. Na­drobnišo so wo tym wuprajić nochce. Wobjednali­ su dwělomnu temu jako po­wšitkownu informaciju. Regularneho dypka na dnjowym porjedźe zašłeho posedźenja měšćanskeje rady njebě.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND