Chcedźa hort zaso we wsy měć

pjatk, 16. decembera 2016
artikl hódnoćić
(0 )

Starši na posedźenju gmejnskeje rady rozhorjeni

Pančicy-Kukow (SN/MWj). Poprawom chcychu Wotrowske hortowe dźěći adwentničku w swojich po wulkej wodźe ponowjenych rumnosćach we Wotrowskej pěstowarni swjećić. Hač pak so to zešlachći, je dwělomne. Přetož přeco hišće njesmědźa wone do swojich rumnosćow zaćahnyć. Wina na tym je, zo njejsu rumnosće hišće twarsce wotewzate. Swoju rozhorjenosć dla toho někotři starši na wčerawšim posedźenju Pančičansko-Kukowskeje gmejnskeje rady zwuraznichu.

Hižo w nowembru měješe so wšitko twarskoprawnisce zrjadować. Potom pak klacaše na někotrych durjach, kotrež pobrachowachu. Nowy termin je nětko 7. februar, štož je staršim wězo přepozdźe. Jako dalšu přičinu dlijenja wjesnjanosta Markus Kreuz (CDU) mjenuje, zo je so ličba Wotrowskich hortowych dźěći, kotrež su tuchwilu přechodnje w Šuli Ćišinskeho zaměstnjene, zwyšiła. Po słowach nawodnicy pěstowarnje Hańžki Nawcyneje je so rozšěrjenje cyłkowneje kapacity wot 45 na 52 Serbskemu šulskemu towarstwu jako nošerjej wot młodźinskeho zarjada přilubiła, ale hakle po tym,­ zo su twarske dźěła zakónčene a schwalene. Tohodla je spěšne wotewzaće přetwarjenych hortowych rumnosćow nuznje trěbne. Wšako buchu spěchowanske srědki za ponowjenje přizwolene.

Dokelž bywaše diskusija wčera přiběrajcy emocionalna, gmejnski radźićel Stefan Rjeda namjetowaše, problem wěcownje rozrisać. Po móžnosći hišće přichodny tydźeń měł sej wot gmejnskeje rady wutworjeny pěstowarski wuběrk přeprosyć zastupjerjow SŠT, zo bychu zhromadnje za móžnym wupućom py­tali. Tón na kóždy pad trjebaja, dokelž je mjeztym tež Pančičanska šula signalizowała, zo Wotrowski hort hižo předołho w jeje rjadowniskich rumnosćach wostać njemóže.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND