Taflički přichodnje tež ze serbskim napisom

Pančicy-Kukow (aha/SN/JaW). Po tym zo je Budyski krajnoradny zarjad póndźelu nimale cyły wokrjes Budyšin ptačeje gripy dla po směrnicach Europskeje unije jako wobkedźbowanske abo zawrjene pasmo wupokazał, nańdźeš při mnohich wjesnych taflach čerwjenu tafličku z napisom „Ptača gripa – zawrjene/wobkedźbowanske pasmo“. Potrjechene su wsy wokoło Njedźichowa, Hućiny, Rakec, Prěčec, južnje Budyšina a mjeztym tež w Delanach wokoło Róžanta. Přičina wukaza je 12. februara pola Kačeje Korčmy namakana běła čapla (Silberreiher), kotraž měješe strašny wirus H5N8 w sebi. Wotpowědne informaciske taflički dóstawaja gmejny wot Budyskeho wokrjesneho weterinarneho zarjada. Na prašenje SN, čehodla su znački jenož němsce a nic tež serbsce popisane, zdźěli nowinski rěčnik wokrjesa Gernot Schweitzer: „Potrjechene gmejny smědźa wězo tež serbske abo dwurěčne taflički připrawić. Dotal pak njejsu nam komuny žanu potrjebu tajkich signalizowali. Při přichodnych naprašowanjach móžemy tež taflički ze serbskim napisom poskićić.“