Ludowy dom wozrodźić

wutora, 29. awgusta 2017
artikl hódnoćić
(0 )
Torsten Pötzsch (nalěwo) a Rico Jung (naprawo) kandidujetaj za wólby Běło wodźanskeho wyšeho měšćanosty. Njedawny wólbny forum z nimaj je Frank Budszuhn (srjedźa) moderěrował.  Foto: Andreas Kirschke Torsten Pötzsch (nalěwo) a Rico Jung (naprawo) kandidujetaj za wólby Běło wodźanskeho wyšeho měšćanosty. Njedawny wólbny forum z nimaj je Frank Budszuhn (srjedźa) moderěrował. Foto: Andreas Kirschke

W Běłej Wodźe maja dweju kandidatow za wólby wyšeho měšćanosty

Běła Woda (AK/SN). Wobydlerjo Běłeje Wody wola 24. septembra noweho wyšeho měšćanostu. Torsten Pötzsch (Klartext) tele zastojnstwo wot lěta 2010 wukonja. A 46lětny Běłowodźan za nje znowa kandiduje. Dale staji so k wólbam 51lětny dotalny komornik města Rico Jung. Pötzsch je nawuknył powołanje bankoweho překupca, dźěłaše pozdźišo pola lutowarnje, bě kontroler w jednym ­zawodźe a do swojeho časa jako wyši ­měšćanosta jednaćel Běłowodźanskeje bydlenjotwarskeje towaršnosće. Jung je po powołanju elektroinstalater. Wot lěta 1988 bě wón technikar w lodosportowym kompleksu města a wot 1993 jón nawjedowaše. Naposledk bě komornik w měšćanskim zarjadnistwje.

Wužadar Rico Jung chce po swojich słowach nutřkowne město wožiwić. Jeho zaměr je, natwarić centralny nakupowanski centrum. Mjeztym wjacore lěta zawrjeny kulturny dom měł po jeho woli zaso ­přistupny być. „Trjebamy městno wosrjedź města za kulturu z wysokej kwalitu“, rjekny wón tele dny na wólbnym ­forumje. Wjace hač sto zajimcow bě ­přeprošenje wokrjesneho zwjazka DGB sćěhowało. Frank Budszuhn zarjadowanje moderěrowaše.­ Wozrodźić Ludowy dom by po słowach Junga wulki dobytk za Běłu Wodu było. Po jeho trochowanju by to znajmjeńša pjeć milionow eurow ­płaćiło. Při wotpowědnym spěchowanju by město mjez 800 000 a 1,7 ­milionami eurow ze swójskeho zaka přidać dyrbjało. Torsten Pötzsch skedźbni na ­dotalne próco­wanja wo Ludowy dom, kotrež ­„wostachu bjez wuspěcha. Nochcu ničo přilubić, štož njemóžu dodźeržeć.“

Dalša tema bě hospodarske spěchowanje. Rico Jung chcył so bóle z přede­wzaćelemi rozmołwjeć a jich jednotliwe problemy rozrisać pomhać. Hospodarske spěchowanje je wobstajnje trěbne. Tež tu jemu Pötzsch znapřećiwi. Wobstajnje wón firmy a zawody wopytuje. Za zasy­dlenje wjetšich předewzaćow pak ma město lědma płoniny. Skerje dyrbjało so wone za wuwiće industrijnišćow we wokolinje zasadźeć, na přikład w Rózborku a Krynhelecach. Zo by Běła Woda jako ­hospodarska městnosć atraktiwniša ­była, chce so Jung wutwarej moder­neje šěrokopasmoweje technologije ­wě­- ­no­wać. Po jeho měnjenju maja w tym nastupanju w Běłej Wodźe něštožkuli ­nachwatać.

Torsten Pötzsch chce so při hospodarskim spěchowanju tohorunja na bywšich wobydlerjow Běłeje Wody koncentrować, kotřiž chcedźa so nawróćić. Město měło jim dobre wuměnjenja skićić a jich při pytanju za bydlenjom a šulu podpěrać. Dalše temy wólbneho foruma běchu přichodne zastaranje z pitnej wodu, wobchadne zwiski města, lěkarske zastaranje a zawěsćenje wohnjoškita.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND