Serbow do jubileja zapřijeć poručenje

wutora, 06. februara 2018
artikl hódnoćić
(0 )

Přirada Wojerec ma za 750. róčnicu wobstaća města wjacore ideje

Wojerecy (AK/SN). Do lětušeho histo­riskeho měšćanskeho jubileja „750 lět Wojerecy“ matej so serbska rěč a kultura po móžnosći wobšěrnje a dosć intensiwnje zapřijeć. Tole přilubi Olaf Dominik, referent wyšeho měšćanosty Stefana Skory (CDU) a čłon organizaciskeje skupiny, na zašłym posedźenju přirady za serbske naležnosće města. „Chwalobny a přikładnje za druhich zarjadowarjow ­wusahuje angažement Michaela Götza napřećo organizaciskej skupinje“, podšmórny předsyda serbskeje přirady Dirk Nazdala. „Jako zarjadowar staroměšćanskeho kuzła wot 1. do 3. junija wón wot samo wjacorych akterow a zastupjerjow institucijow a towarstwow, kotrež so na naj­wšelakoriše wašnje hajenju serbskeje rěče a kultury wěnuja, do přihotow a přewjedźenja wulkeho zarjadowanja zapřijima“, Nazdala doda.

Přichodnje a njewotwisnje wot měšćanskeho jubileja ma plan zarjadowanjow na internetnej stronje www.hoyers- werda.de za koordinaciju terminow k dispoziciji być. Tak móhli towarstwa a institucije swoje plany sčasom z druhimi zarjadowarjemi wothłosować. Za předstejacu wulku róčnicu města předwidźana je wustajeńca „60 lět Wojerecy-nowe město“. Za nju pytaja organizatorojo hišće­ wobsahi ze serbskeho wšědneho žiwjenja, kotrež bychu so do tajkeje přehladki hodźeli.

Serbska přirada města přihotuje tuchwilu literarne wubědźowanje „750 lět serbska rěč we Wojerecach“. Wone měri so na 4. lětnik zakładneje šule „Handrij Zejler“ Při Worjole, na 5. lětnik křesćanskeho gymnazija Johanneum a Lessingoweho gymnazija. Nastać maja na te wašnje literarne přinoški najwšelakorišich žanrow. Šulerjo móža swoje dźěła hač do 31. meje zapodać. Rozmołwny partner za to je Werner Sroka we Wojerowskim Domowinskim domje na Drjež­dźanskej 18 (tel. 03571/ 418 026, e-mail: ). Wuběr zapodatych tekstow chcedźa pozdźišo w klubowni Domowinskeho domu zjawnosći spřistupnić. Tři najlěpše přinoški budu mytowane.

Serbska přirada nimo toho namjetuje, lětsa wudać dwurěčnu brošurku „Serbja we Wojerecach“. To by po słowach jeje čłonow hódny přinošk k jubilejej było. Zdobom měła brošurka přinošować k wubědźowanju „Rěčam přichilena komuna – serbska rěč je žiwa“. Po předstawach přirady móhli Wojerecy sćěhować přikład města Budyšina. Wone je w lěće 2006 a 2016 z nakładom stajnje 4 000 eksem­plarow wudało brošurku wo Serbach w sprjewinym měsće. Temy Wojerowskeje brošurki měli mjez druhim być „Serbska rěč w měšćanskim wobrazu“, „Serbske stawizny jako dźěl měšćanskich stawiznow“, „Serbske zarjadnišća a towarstwa we Wojerecach“, „Serbske žiwjenje w měšćanskich dźělach“, „Serbske wosobiny we Wojerecach a „Serbskorěčne wobroty“.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND