W domje, hdźež je Ćišinski bydlił, su nětko překwapjenku dožiwili
Pančicy-Kukow (SN/MWj). Štóž je hdy starši dom přetwarił, móže štučku wo tym spěwać, kotre njewočakowane překwapjenki při tym dožiwješ. To wobkruća tež Andreas Kuring w Pančicach-Kukowje. Wón je swoje domske při hłownym puću bjezposrědnje při tuchwilnym twarnišću noweho mosta hižo wjacekróć přetwarjał a ponowjał.
Wosebitosć je, zo bě w Kuringec domje hižo wjele swójbow bydliło, a tak je Pančičan při twarskich dźěłach časćišo historiske wěcy namakał. Zajimawostka bě na přikład towaršna hra z časa nacionalsocializma, kotruž bě tam něchtó po wšěm zdaću 1945 před sowjetskim wójskim schował. Spočatk 80tych lět je wón samo raz blešu wina z lěta 1943 namakał. W njej pak bě bohužel jenož hišće kisało.