Budyšin (SN/at). W meji je Sakski krajny sejm Zakoń wo přizwolenju pawšalnych připokazankow ke skrućenju wjesneho ruma w Sakskej wobzamknył. Lětsa, klětu a w lěće 2020 maja gmejny stajnje 70 000 eurow přidatnje k dispoziciji. Wot toho tydźenja swobodny stat nětko pjenjezy přepokaza. Smy so wobhonili, za čo chcedźa komuny je wužiwać.
„Pawšala je wutoru na našim konće dóšła“, rjekny Bukečanski wjesnjanosta Norbert Wolf (CDU). A namjety, za čo hodźa so přidatne pjenjezy w gmejnje wužiwać, po słowach wjesnjanosty tež maja. Dźěl srědkow chcyli sobu za kolesowy parcours wužiwać, kotryž je hižo přepodaty. Dalši móžny projekt je parkowanišćo za jězdźidła pućowarjow pod Čornobohom we Wuježku. Přidatne srědki bychu sobu pomhali trěbne naležnosće rjadować, kotrež njemóžachu w etaće planować. „To su předstawy, wo kotrychž dyrbi wězo naša gmejnska rada rozsudźić“, Norbert Wolf podšmórny.