Zakładny kamjeń za nowu katolsku pěstowarnju połožili
Kulow (AK/SN). Blisko Krabatoweje zakładneje šule w Kulowje nastawa nowa katolska pěstowarnja. Tam su minjeny pjatk zakładny kamjeń połožili. Nošer budźe kaž dotal katolska wosada. Nowotwar płaći něhdźe štyri miliony eurow. Třećinu toho zapłaći město Kulow, tamnej třećinje dóstanu jako spěchowanske srědki. Kónc lěta 2019 ma nowe dźěćace dnjowe přebywanišćo hotowe być. Kapacita rozšěri so potom wot dotal dohromady 140 městnow na cyłkownje 215. W přizemju budźetej žłobik a pěstowarnja zaměstnjenej, na hornim poschodźe hort.