Ryzy kopiju wotpokazali

wutora, 09. oktobera 2018
artikl hódnoćić
(0 )

Chróšćanscy radźićeljo argumentaciju z Delan njepřewozmu

Chrósćicy (aha/SN). Poprawom bě minjeny štwórtk na posedźenju Chróšćanskeje gmejnskeje rady po dnjowym porjedźe předwidźane, „wobzamknyć zapodaće próstwy gmejny Chrósćicy knježerstwu Swobodneho stata Sakskeje wo regulaciju wjelčeho wobstatka“. Wjesnjanosta Marko Kliman (CDU) do wobjednanja tohole dnjoweho dypka na to skedźbni, zo drje su w zašłosći naležnosć hižo narěčeli. Nětko pak je trjeba to tež zjawnje činić. Kaž bě hižo gmejna Ralbicy-Róžant swoje žadanje sakskemu knježerstwu zapodała, měješe so nětko Chróšćanska tomu přizamknyć. Čim wjace komunow to čini, ćim doraznišo móhł ministerski prezident Michael Kretsch­mer (CDU) žadanje za trěbnej regulaciju wjelčeho wobstatka přednjesć, argumentowaše Kliman.

Radźićel Roman Nuk (CDU) wot wjesnjanosty němsce přednjesenemu spisej sakskemu knježerstwu znapřećiwi, zo drje ma za prawe dźiwać po potrjebje na regulowanje wjelčeje populacije. Přednjesenemu wobsahej, kotryž njewotpowěduje situaciji w Chróšćanskej gmejnje, pak njemóže přihłosować. Nuk wotpokaza, zo w próstwje prosće tak argumentuja kaž w Braniborskej abo samo posłownje kaž w Ralbicach-Róžeńće.

Předsyda zaměroweho zwjazka Při Klóšterskej wodźe Měrko Domaška pokaza na to, zo je Koslowska iniciatiwna skupina na wobsah dźiwała. Radźićel Jan Wjesela (Serbske wolerske zjednoćenstwo) namjetowaše, wo předłoze tajnje wothłosować. Mjeztym zo wjesnjanosta móžne postupowanja tajneho wothłosowanja přednjese, Roman Nuk porokowaše, zo ma předležacy spis z jeho wobsahom za njezmysł. Tak skedźbni wón na to, zo widźi wšědnje stadło wowcow, wokoło kotrehož ani přidatny škit připrawjeny njeje. Žadanje w lisće, wowčerjam prawo dać wjelki morić, ma Nuk za runje tak absurdne kaž wotpohlad, problem wjelkow pawšalnje tym gmejnam pře­wostajić, hdźež maja něhdyše wojerske zwučowanišća a nasypnišća wuhlowych jamow. Jeho namjet, ničo wot druhich njekopěrować, ale wotpowědnje swojim poměram sami něšto sformulować, Chróšćanscy radźićeljo přiwzachu.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND