Žane dojednanje pomjenowanja dróhow w Dobrošicach dla
Njeswačidło (JK/SN). Pomjenowanje wjesnych pućow w Dobrošicach Njeswačanska gmejnska rada wčera wobzamknyć njemóžeše. Po tym zo běchu tamniši wjesnjenjo mjena namjetowali a na wobydlerskej zhromadźiznje gmejnskej radźe a wjesnjanosće Gerdej Schusterej (CDU) předstajili, njemóžachu so radźićeljo wčera dojednać, mjenje dróhow Lipa a Janska přiwzać. Wobě móhłoj po měnjenju wjetšiny radźićelow k njedorozumjenjam wosebje pola logistiskich předewzaćow a cuzych wjesć. Wjesnjenjo běchu mjenje namjetowali, dokelž hodźitej so němsce a serbsce wužiwać. Tomu njemóžachu so radźićeljo přizamknyć. Dojednachu pak so na to, z wjesnjanami w Dobrošicach hišće raz wo móžnych alternatiwach rěčeć a hinašej, we woběmaj rěčomaj hódnej pomjenowani namakać. Wčera mějachu znajmjeńša hižo jedyn nowy namjet za Jansku, kotryž poćahuje so na něhdyše ležownostne pomjenowanje. Kaž wjesnjanosta Schuster zdźěli, měli pak wjesnjenjo na kóncu měć poslednje słowo.